|
Actualidade CIG-Comunicación-
O Convenio da Fundación Valdegodos foi asinado, no seu momento, por cinco anos, rematando a súa vixencia o 31 de decembro de 2007. Porén, ao non ser denunciado –trámite legal obrigatorio para proceder á súa renovación– quedou prorrogado por un ano máis, até o 31 de decembro. Adriano Brito, da CIG de Valdeorras explica que “agora que temos representación legal, é a oportunidade de mellorar as nosas condicións de traballo mediante unha negociación aberta, democrática e participativa” e fai un chamamento a preparar, canto antes, esta negociación. Por iso, a CIG de Valdeorras anuncia que nas vindeiras datas convocará, a través dos delegados e delegadas, unha xuntanza cos Comités de Empresa de todos os centros da Fundación “para expor a nosa proposta e unificar criterios para ter a suficiente maioría de representación e afrontar unha negociación con garantías”. Brito matiza que a CIG promoverá a participación asemblearia de todo o persoal para posibilitar que sexan as traballadoras e traballadores quen teñan a última palabra e anuncia que “todas aquelas persoas que queiran contactar con nós ou pedir algún tipo de información, poden facelo, ben directamente no noso local de O Barco, ou mediante a páxina web que a nosa Sección Sindical ten na Sanidade no HCV, e na que temos un apartado específico para as Residencias da terceira Idade, no seguinte enderezo: http://www.blogoteca.com/cigsaudebarco”.
A falta de que se celebrar o proceso de eleccións sindicais no centro de Quiroga da Fundación Valdegodos, a CIG obtivo representación nos centros de Viana do Bolo –onde é maioritaria- e ‘Virgen de los Milagros’, cun total de 5 delegados/as, fronte aos 9 de UGT e 2 de CCOO. Porén, Adriano Brito matiza que “non podemos afirmar que o proceso electoral fose limpo, xa que houbo e segue habendo, continuas presións por parte da empresa para impedir a nosa presenza nos órganos de representación do persoal, ao tempo que promocionaban con inusual descaro as candidaturas da UGT”. En todo caso, desde que se celebraron as eleccións, a CIG xa convocou varias asembleas nas residencias de Viana do Bolo e na de ‘Virgen de los Milagros’. No caso de Viana do Bolo, xa se acadou un principio de acordo canto a vacacións, libranzas e cambio de quendas, quedando pendentes de resolver outros temas como a xornada diaria e a súa adaptación ao cómputo anual que estabelece o convenio. Porén, na residencia ‘Virgen de los Milagros’, “ante a pasividade de UGT, a Dirección do centro négase a estabelecer diálogo, malia as xestións que teñen feito os delegados da CIG e a propia central, chegando mesmo a manter unha entrevista coa directora na que lle fixemos chegar a nosa proposta de abrir unha Mesa de negociación das condicións de traballo de todo o persoal, obtendo desta a calada por resposta”, afirma Brito. De aí que se faga ese chamamento á unidade das traballadoras e traballadores e aos representantes da UGT “para que exerzan as responsabilidades para as que foron elixidos”. |
||||||||
Informacións relacionadas
|
||||||||
|
||||||||
|
ÚLTIMA REVISIÓN: 05/03/2008 |
||||||||
|
