Actualidade Santiago, 8 de marzo de 2008 O luns 10 de marzo presentarase unha denuncia no xulgado do Social A Fundación Valdegodos incumpre a lei no referido ao dereito a descanso mínimo das/os traballadoras/es   CIG-Comunicación- cig.prensa@galizacig.com   Na Fundación Valdegodos hai traballadores e traballadoras que entre xornada e xornada só descansan sete horas, e isto durante sete días seguidos, vulnerando de forma continuada os dereitos laborais dos traballadores e os dereitos dos residentes a unha asistencia de calidade.   A CIG de Valdeorras vén de denunciar que na Fundación Valdegodos séguense a vulnerar os dereitos máis fundamentais das traballadoras e traballadores. O secretario local, Adriano Brito, sinala, en concreto, o incumprimento da lei no referido ao descanso mínimo que debe mediar entre xornada e xornada, que o Estatuto dos Traballadores marca en, cando menos, 12 horas. Se o cumprimento desta norma é fundamental en calquera actividade laboral coa finalidade de previr accidentes de traballo, mais o é nunha actividade que conleva o coidado de persoas maiores, en moitos casos con mobilidade moi reducida ou mesmo con falta de mobilidade, onde non só hai que prever a accidentalidade do traballador ou traballadora senón a da persoa maior á que se asiste. Brito explica que na Fundación Valdegodos hai traballadores e traballadoras que entre xornada e xornada só descansan sete horas, e isto durante sete días seguidos, vulnerando de forma continuada os dereitos laborais dos traballadores e os dereitos dos residentes a unha asistencia de calidade. “Se a esta práctica engadímoslle os cambios semanais nos calendarios de quendas podemos atoparnos diante dun cóctel explosivo de imprevisíbeis consecuencias para a calidade asistencial dos residentes e para a saúde dos traballadores e traballadoras”, matiza. O secretario local da CIG de Valdeorras anuncia que, posto que os continuados requirimentos feitos pola Confederación Intersindical Galega (CIG) á dirección da citada fundación para arranxar esta situación “pola vía do diálogo e da cordura que debe imperar nas relacións laborais caeron en saco roto, o próximo luns demandaremos no Xulgado do Social á Fundación Valdegodos por varios destes abusos, amais de presentar as denuncias correspondentes na Inspección Provincial de Traballo”. Tres meses de requirimentos “Como organización sindical de clase non podemos demorar a nosa intervención diante das agresións que están a sufrir os traballadores por parte de quen dirixe a citada fundación, que o fai con maneiras máis propias dos anos corenta que con actitudes e métodos propios dos tempos actuais”, sinala Brito. E é que logo de tres meses de requirimentos ao diálogo por parte da CIG, a dirección da Fundación Valdegodos segue sen decatarse da situación e das consecuencias que a súa actuación pode ter sobre traballadores e residentes. As anunciadas demandas e denuncias son un primeiro paso no camiño de forzar á fundación a iniciar un camiño de diálogo. Porén, se este non se produce e séguese a vulnerar a legalidade por parte da empresa, “verémonos na obriga de actuar con todos os medios lexítimos que a organización dos traballadores pon ao noso alcance para rematar coas arbitrariedades e abusos da empresa e facer cumprir tanto o convenio colectivo polo que, na actualidade, se rexen as relacións laborais nos establecementos da Fundación Valdegodos como as leis de ámbito xeral que regulan as relacións entre empresas e traballadores”, sostén.

Informacións relacionadas 05/03/2008 Sempre que conten co apoio maioritario das traballadoras e traballadores A CIG de Valdeorras adoptará medidas de presión na Fundación Valdegodos para que se cumpra o Convenio 08/02/2008 Xa se denunciara a actitude antidemocrática da dirección da empresa en decembro a raíz do proceso de eleccións A CIG de Valdeorras adoptará medidas se non frean as presións nos centros da Fundación Valdegodos 27/11/2007 Con motivo do proceso de eleccións sindicais A CIG-Ourense denuncia presións aos traballadores da Residencia da Fundación Valdegodos en Viana do Bolo

Confederación Intersindical Galega www.galizacig.com ÚLTIMA REVISIÓN: 08/03/2008 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta