|
Actualidade CIG-Comunicación-
Despois da asemblea, pasadas as doce e media da mañá, saía do local sindical, preto da Praza de Ferrería, unha manifestación até a Praza 8 de Marzo. Na mobilización coreáronse consignas contra a discriminación laboral, polas retribucións salariais igualitarias, así como se lembrou a figura de Amador e Daniel, e a importancia da xornada do 10 de Marzo para a clase obreira galega. Na Praza 10 de Marzo, a secretaria confederal da Muller, Mª Carme López, deu lectura a un manifesto, que anexamos ao final desta nova, e no que se salientaba a denuncia da dobre xornada laboral que teñen que desenvolver as mulleres, e que se está a converter “no asasino silencioso das mulleres”. A secretaria confederal da Muller chamou á “rachar coa división social e sexual do traballo no interior do fogar familiar, que implica un esforzo colectivo”. Ademais lembrou que o 7 de marzo terá lugar en Compostela o acto nacional de entrega do Premio 8 de marzo, dirixido a recoñecer o labor de mulleres ou colectivos de mulleres traballadoras en defensa dos seus dereitos.
Despois desta intervención, Rafa Iglesias, secretario comarcal da CIG de Pontevedra, dirixiu unhas palabras aos concentrados/as, nas que lembrou a convocatoria da manifestación nacional en Ferrol a tarde do 10 de marzo. Iglesias lembrou a “xusta reivindicación dos traballadores da Bazán que é o xermolo do sindicalismo nacionalista”, e recolleu esta data para lembrar a importancia da negociación colectiva, como foi no ano pasado a de Trebes Galiza, ou nos convenios da Construción ou do Metal da provincia de Pontevedra.
«En Galiza levamos séculos loitando pola equiparación entre as condicións laborais ou profesionais do home e da muller. Aínda hoxe denunciamos que as mulleres seguen a sufrir violencia e discriminación, tanto nos ámbitos de saúde, a reprodución e a educación, como nos ámbitos da promoción profesional, intelectual e política. Seguimos atopando un teito de cristal que limita a nosa equiparación cos homes, sobre todo cando queremos acceder a postos de liderado político, económico, social, intelectual. Pero por se isto non é pouco, a muller destina moitas máis horas ca o home por xornada laboral ás tarefas domésticas, de xeito que o fogar segue a ser o segundo centro de traballo para a muller, un traballo que non é remunerado e que lle impide descansar do traballo realizado fóra da casa. A dobre presenza estase a converter no asasino silencioso de moitas mulleres. Aínda que non se vexa, a saúde das traballadoras está sendo gravemente afectada. A dobre e mesmo ás veces tripla xornada de traballo que enfrontan miles de galegas está causando graves problemas de saúde física e psicolóxica que irremediablemente afecta ao desempeño laboral e familiar destas. Cada vez son máis as traballadoras que sofren estrés, depresión, ansiedade, insomnio, trastornos de alimentación, ataques cardíacos, e accidentes relacionados coa carga de traballo. Rachar coa división social e sexual do traballo no interior do fogar familiar implica un gran esforzo colectivo. Require amosar as raíces estruturais de tal división e a importancia política do pacto social que a mantén. Pero para isto tamén precisamos políticas sociais que atendan ás carencias materiais da conciliación, que ademais sexan capaces de mudar as pautas e os valores que hoxe en día sosteñen o mencionado modelo. Desde a Secretaría da Muller da CIG cremos necesario denunciar esta situación. As traballadoras debemos organizarnos e deter a explotación da dobre xornada de traballo. As mulleres temos que garantir o tempo para participarmos da vida pública, política, sindical e cultural do país. Con motivo desta data a Secretaría da Muller organiza o día 7 de marzo o acto nacional de entrega do Premio 8 de Marzo, dirixido a recoñecer o labor de mulleres ou colectivos de mulleres traballadoras en defensa dos seus dereitos». |
|||||||||||||
Informacións relacionadas
|
|||||||||||||
|
|||||||||||||
|
ÚLTIMA REVISIÓN: 07/03/2008 |
|||||||||||||
|
