|
Actualidade CIG-Comunicación-
A través dun comunicado de prensa a comarca da CIG de Ourense achéganos a súa avaliación da sentenza condenatoria a Benigno Moure, que expón nestas liñas: “1.- Hai perto de dez anos que o noso sindicato, ante as testemuñas das que tivo coñecemento, denunciou distintas prácticas que se viñan seguindo nesta entidade, tanto no que respecta ás persoas usuarias: malos tratos, insuficiencia sanitaria, falta de persoal, atención deficiente, etc., como o que tiña a ver coas persoas que na mesma traballaban: falta de liberdade sindical, malas condición laborais, etc. e incluso co negocio que escondía a actividade da Fundación. 2.- Como consecuencia de dita denuncia, esta central e, nomeadamente, algunhas das persoas que a representan, foron vítimas dunha dura campaña de menoscabo da súa honra e incluso de certas prácticas represivas por parte da administración da xunta –en mans do PP naquela altura- e da administración de xustiza que, ante as denuncias realizadas, actuou con desleixo contra o hoxe condenado, en contraste coa dilixencia coa que se empregou contra a CIG e os seus dirixentes. É preciso lembrar que no seu momento Etelvino Blanco Rodríguez, secretario comarcal da CIG, foi condenado polo xulgado, á pena de 7 meses de prisión menor e 150.000 pesetas de multa (950€), á suspensión do dereito de elixir ou ser electo para cargos públicos e ao pagamento das costas do proceso e a unha indemnización para o hoxe condenado de 1.000.000.-pts. (6.000€) por, entre outras aseveracións de teor similar, dicir que estaba disposto a descubrir “todo o negocio sucio que esconde” ou que a CIG investigará as posíbeis irregularidades existentes para “descubrir o negocio sucio que se esconde tras unha asociación que se aproveita dos desvalidos para o seu lucro particular”, tal como recollen os feitos probados da sentenza. 3.- A sentenza condenatoria de D. Bengino Moure demostra que as denuncias da CIG tiñan fundamento e que o feito de non seren atendidas no seu día, foi un grave erro e unha inxustiza. 4.- Celebramos que por fin se comece a facer xustiza, tanto con quen delinquiu como con quen non fixo máis que cumprir o seu deber cívico a pesar das duras presións que tivo que soportar. 5.- A CIG entende que esta sentenza debe servir como reflexión para toda a cidadanía do que significa negociar co benestar dos nosos maiores, así como da necesidade de pular polos servizos públicos de calidade en detrimento das asistencia privada e concertada. 6.- Agardamos que a autoridade en materia de asistencia social tome boa nota da sentenza e realice as auditorías asistenciais necesarias, tanto nesta como no resto de fundacións da provincia e do país, para garantir unha correcta atención ás persoas maiores e discapacitadas, así como á realización de auditorías económicas que garantan o bo fin do diñeiro público do que se nutren este tipo de institucións. 7.- Instamos á autoridade laboral e inspectora a que fiscalicen as condicións de traballo que se dan neste tipo de organizacións privadas. 8.- Instamos a administración da Xunta, nomeadamente á Vicepresidencia, a que abandone este nefasto modelo de xestión privada e concertada e camiñe cara un modelo público, construíndo residencias públicas e non renovando os concertos que vaian vencendo, fiscalizándoos eficientemente mentres non se extingan”.
|
||||||
|
||||||
|
ÚLTIMA REVISIÓN: 14/03/2008 |
||||||
|
