Balance sindical / Voceiro da Federación de Banca, Aforro, Seguros e Oficinas 
Nº 16 - xuño 2005 |
||||||||
| O rural galego xa non resulta rendible
|
||||||||
Os bancos botan o peche ás oficinas dos pequenos pobos O rural galego xa non resulta rendible |
||||||||
|
BS |
||||||||
|
Só hai que dar unha volta por calquera concello do rural galego para contemplar os locais baleiros nos que antes había oficinas bancarias. A crise dos sectores primarios (agricultura, gandería e pesca) provocou unha desfeita económica e social do rural galego, sen que as administracións públicas (Central, Xunta e Concellos) procuraran un desenvolvemento económico alternativo. Agora a crise está afectando ao sector financeiro que está a pechar oficinas. A escasa rendibilidade fai que moitas oficinas bancarias do rural estean abocadas a pechar as súas portas a curto e medio prazo. O negocio bancario neses pobos quedou reducido ás pensións, ás contas de prazo dos pensionistas e ás cada vez menores remesas da emigración. Á reestruturación da rede de oficinas do Banco Pastor, que pechou o ano pasado 21 oficinas na Galiza, hai que engadir a que ten en marcha o Banco Gallego, entidade que xa pechou oficinas no pasado e que ten anunciado o peche total de 8 oficinas e o peche parcial de outras 4 para este ano. Pola súa banda, as caixas contemplan como se reduce o aporte da rede galega aos beneficios da empresa, pero ata agora o peche de oficinas é máis difícil ante a presión dos Concellos. O sector financeiro galego sufrirá unha nova reconversión a curto prazo; será papel dos sindicatos que non sexa traumática para o persoal afectado. |
||||||||
|
En marcha o Convenio de Oficinas de Ourense |
||||||||
|
BS |
||||||||
|
O inicio do proceso de negociación do 1º Convenio de Oficinas e Despachos de Ourense provocou unha gran expectación entre os/as traballadoras do sector, que apoiaron maioritariamente as asembleas convocadas polas centrais sindicais. Cerca de 400 persoas asinaron nos últimos dous meses unha petición á patronal en apoio á Plataforma Sindical que foi aprobada en asemblea. Na última xuntanza da Mesa Negociadora, o 5 de maio, os tres sindicatos convocantes (CIG, CCOO e UGT) deixaron claro que só asinarán un acordo que como mínimo recolla a media dos outros convenios galegos. Para os sindicatos, a vontade manifesta e decidida, a través das sinaturas, é un feito importante que a Patronal non pode ignorar, a menos que desprecen ás súas empregadas e empregados. Agora a pelota está no aleiro da Patronal, que adquiriu o compromiso de presentar unha nova proposta. |
||||||||
|
Esta decisión encaixa coas reivindicacións da CIG, senta precedente e supón recoñecemento ao traballo deste colectivo Caixa Galicia liga o salario dos apoderados ao IPC |
||||||||
|
BS |
||||||||
|
A decisión de actualizar os Complementos Funcionais do persoal apoderado con cláusula de revisión, na mesma contía que establece o Convenio Colectivo para os salarios, foi valorada positivamente polas persoas afectadas. En anos anteriores, a empresa actualizaba unilateralmente o coñecido como Salario Mínimo Garantido (SMG) e a suba sempre fora por baixo do establecido no Convenio e sen cláusula de revisión. Esta decisión da empresa encaixa coas reivindicacións defendidas pola CIG, que historicamente viña solicitando a modificación deste complemento como xa informamos no Balance Sindical nº 9 de maio de 2003. Nese ano, a CIG convocou asembleas de apoderados e apoderadas por toda Galiza, así como unha recollida de sinaturas solicitando a actualización do complemento con cláusula de revisión e na contía que establecía o convenio para os salarios. O acordo foi valorado positivamente pola CIG, xa que senta un precedente para vindeiros anos, equipara a suba salarial do persoal apoderado coa do resto e supón un recoñecemento ao traballo deste colectivo despois da presión comercial que sufriu especialmente ao longo do primeiro trimestre. Pola súa parte, CCOO ten criticado o acordo por considerar que é por un só ano, que a suba é insuficiente e porque “a empresa non contou coa representación maioritaria dos traballadores/as”. |
||||||||
|
O Banco Gallego inclúe o cambio de funcións de 107 persoas no plano de reestruturación |
||||||||
|
BS |
||||||||
|
A Dirección de RRHH anunciou á representación sindical que existe un listado de 107 persoas que terán que deixar as súas funcións actuais como administrativos/as; unhas ocuparán postos de dirección, outras de intervención e o resto serán comerciais. Estes cambios poden traducirse en traslados que incluso superen os 25 quilómetros. No prazo dun mes, a Dirección do banco vai poñerse en contacto coas persoas afectadas, sen que de momento os sindicatos teñan coñecemento dos nomes das traballadoras e traballadores incluídos neste listado, e sen que se teñan negociado as posibles contrapartidas económicas. A Sección Sindical da CIG aproveitará tamén este mes para visitar tódalas oficinas co fin de avaliar co persoal esta restructuración. |
||||||||
|
CCOO, UGT e FITC lúcranse, e CITIGROUP despide A CIG mobilízase por un despedimento inxusto na oficina do Citifinancial de A Coruña |
||||||||
|
BS |
||||||||
|
María Jesús Paredes, secreta- ria xeral de Comfía-CCOO, viaxou aos EEUU para ver un partido dos Angeles Lakers e recibiu tamén 2 ordenadores portátiles por conta do Citigroup. Así o recolle unha sentencia do Xulgado do Social nº 35 de Madrid que describe este pago como un “incentivo” despois de que o sindicato CCOO asinara acordos co banco. Pero ese non foi o único pago. A sentencia así mesmo recoñece que CCOO, UGT e FITC recibiron a cantidade de 650.000 euros como contrapartida por asinar acordos con esta entidade. Aqueles acordos comezan agora a pasar factura ao persoal cunha vaga de despedimentos. Un destes é o caso dunha traballadora da sucursal do Citifinancial de A Coruña.
No caso da oficina de Citifinancial en A Coruña, a traballadora foi despedida alegando a empresa “faltas de puntualidade e baixo rendemento”. Dáse a circunstancia de que esta traballadora reincorporouse ao seu posto de traballo no mes de xaneiro despois dunha baixa de enfermidade por “Síndrome ansioso-depresivo por motivos laborais”, segundo o informe médico do Sergas. A CIG ten iniciado un proceso de mobilizacións solicitando a readmisión da compañeira despedida. |
||||||||
|
O Pastor cesa a Fulgencio García |
||||||||
|
BS |
||||||||
|
O venres 29 de abril, as oficinas do Banco Pastor amañecían empapeladas con carteis nos que o conselleiro delegado, Fulgencio García Cuellar, disparaba contra os dereitos laborais dos traballadores e traballadoras da empresa; era un anticipo do que estaba por vir. Ás 12 da mañá, preto dun cento de representantes sindicais concentrábanse na sede da Fundación Barrié de la Maza-Banco Pastor, no Cantón Grande de A Coruña, onde se celebraba a Xunta Xeral de Accionistas 2005, e posteriormente cortaron o tráfico durante uns minutos. Os delegados e delegadas da CIG repartiron milleiros de panfletos nos que denunciaban que “ningún obxectivo comercial pode xustificar a presión sobre o persoal que deriva no acoso moral aos empregados e empregadas, e no incumprimento da legalidade vixente”. Continuaba así a campaña de mobilizacións con concentracións nas oficinas do banco por todo o país e asembleas solicitando o cese de Fulgencio García pola súa política antilaboral. Finalmente, o 26 de maio o Consello de Administración relevaba a Fulgencio García Cuéllar como conselleiro delegado. A Sección Sindical da CIG avalía positivamente este cambio agardando que se traduza nun novo clima laboral. |
||||||||
|
Ano tras ano suben os beneficios empresariais dos bancos pero baixan os salarios |
||||||||
|
BS |
||||||||
|
O día 11 de maio, a Patronal AEB, xunto con CCOO e UGT, asinaron o Convenio Colectivo Estatal de Banca para os anos 2005 e 2006. O resto das centrais sindicais con representación na Mesa de Negociación non o suscribiron No ano 2004 os empregados e empregadas de Banca tiveron unha perda salarial do 0,70%. Pola contra, os beneficios das entidades medraron un 23% nese mesmo período. Queda claro que é necesario un novo reparto máis equitativo e máis xusto cara ós traballadores, mais este novo reparto terá que agardar, non será dende logo no XX Convenio Colectivo.
AEB, CCOO e UGT inventaron no pasado convenio o que denominan cláusula de revisión “atenuada”, que na práctica consiste en que actualizan as táboas salariais pero sen que os traballadores/as perciban atrasos se o IPC supera a suba pactada. Dende o ano 1999 o persoal do sector vén perdendo poder adquisitivo de xeito continuado debido á falta da cláusula de revisión. Esta perda viuse agravada pola suba dos prezos dos produtos básicos por mor da introdución do euro e pola suba incontrolada do prezo da vivenda. Cabe lembrar que o IPC non recolle o prezo da vivenda, que nos últimos 8 anos medrou nun 108%. E se falamos de vivenda, os préstamos establecidos no Convenio están tan limitados que na práctica moi poucos empregados/as poden beneficiarse dos mesmos. O aceso á vivenda só é posible polas melloras establecidas a nivel de empresa. Onde si tivo tradución a suba dos beneficios das entidades foi no salario da Alta Dirección, que engrosa as súas retribucións con subas millonarias, con plans de pensións individuais e con stock-options.
Nin un sábado menos. O novo Convenio non reduce a xornada laboral nin os sábados, aprazando novamente unha reivindicación histórica do persoal do sector. A única medida en materia de xornada é a ampliación do período das vacacións a 23 días laborais, superada na práctica a nivel de empresa. No Banco Pastor as vacacións son 23 días efectivos, ampliables segundo as datas de disfrute ata 27; no Banco Gallego son 24 días efectivos ampliables a 25; no SCH, 23 días laborais ampliables a 24; no Banesto son 28 días laborais ou 30 naturais; e no BBVA as vacacións van de 24 a 29 días hábiles, segundo as datas de disfrute. Así pois en materia de xornada, sábados, vacacións ou horarios nada cambia. A patronal non cedeu un ápice pero a CCOO e UGT deulles igual. A CIG propuxo que fose creado un complemento de pensións ligado ao salario cunha achega anual do 5%, cun mínimo de 1.000 euros, proposta que foi rexeitada pola AEB. O Convenio Colectivo do ano 1980 deixou sen complemento aos traballadores/as posteriores a esa data, creando unha discriminación en base á data de entrada. Naquelas empresas que teñen exteriorizados os fondos, a Lei de Planos de Pensións obrigou a crear un complemento para este persoal, pero as contías pactadas son mínimas, manténdose a diferenza entre o persoal anterior e posterior a 1980. O XX Convenio non recolle ningunha mellora nesta materia, polo que a homologación queda adiada para vindeiras negociacións.
|
||||||||
|
|
||||||||
| Edita: Federación de Banca, Aforro, Seguros e Oficinas da CIG (Confederación Intersindical Galega). Enderezo: Rúa Gregorio Espino, 47 entrechán. 36205-Vigo (Galiza). Tel: 986 827931-32, 986 262689. Fax: 986 262844. e-mail: banca@galizacig.net. Internet: http://www.galizacig.com. Comisión de propaganda: Pablo Carreira Leis, Clodomiro Montero Martínez, Sefi Romero Álvarez. Maquetación e deseño: Departamento de Propaganda da CIG. Edición electrónica: Fernando Pol Trigo. | ||||||||
|
|
||||||||
|
ÚLTIMA REVISIÓN: 16/06/2005 |
