As traballadoras e traballadores dos servizos de limpeza dos centros que integran o CHUAC continúan as mobilizacións para demandar o cumprimento dos convenios colectivos. Logo de vinte días de protestas diarias, as empresas das subcontratas de limpeza do Complexo Hospitalario (Linorsa, Valoriza e SamyL) proseguen na súa teima de incumprir os acordos asinados e publicados e aínda non estabeleceron ningún contacto cos representantes do persoal.

As protestas das traballadoras e os traballadores dos servizos de limpeza do CHUAC trasladáronse esta mañá ao hospital Abente y Lago, onde se agardaba que a conselleira de Sanidade participase nun acto oficial. O persoal, que finalmente non chegou a ver á responsábel do departamento de saúde, advertiu que manterá as mobilización até que dende as empresas e o Sergas se acheguen garantías do cumprimento dos convenios colectivos.

Traballadoras e traballadores das Residencias Privadas da Terceira Idade retomaron este xoves as protestas a prol dun convenio para o sector. Desta volta desenvolveron unha concentración diante da residencia Concepción Arenal de A Coruña, xestionada por Mapfre-Quavitae, e marcharon a pé até a delegación territorial da Consellaría de Traballo e Benestar, onde guindaron cueiros usados en sinal de protesta polo silenzo da administración neste conflito.

Unha mañá máis, desafiando o frío, os traballadores e as traballadoras dos servizos de limpeza dos centros adscritos ao CHUAC volvéronse concentrar diante da Xerencia do Complexo Hospitalario para reclamar o cumprimento dos convenios colectivos. Mentres, dentro do edificio, representantes da CIG-Servizos mantiñan unha xuntanza co xerente, na que este se comprometeu a mediar no conflito para acadar a aplicación dos acordos asinados e publicados.

Os traballadores e traballadoras dos servizos de limpeza do CHUAC continúan esta semana co calendario de mobilizacións nas instalacións do Complexo Hospitalario en demanda do cumprimento dos convenios colectivos por parte das empresas adxudicatarias. Este luns 14 e o martes 15 volveron desenvolver concentracións diante da Xerencia, á espera do resultado da reunión que o mércores manterán co xerente do Complexo.

O persoal dos servizos de limpeza dos centros adscritos ao Complexo Hospitalario Universitario de A Coruña (CHUAC) continúa co calendario de mobilizacións para exixir ás empresas concesionarias do servizo o cumprimento estrito dos convenios colectivos. Esta mañá concentráronse diante da Xerencia para lembrar á dirección do CHUAC que é a responsábel última de facer cumprir ás empresas subcontratadas as condicións pactadas e advertiron que non descartan convocar folga en todo o complexo se proseguen os incumprimentos.  

A CIG vén de reclamar á Xunta de Galiza que asuma e aplique ao 100% o Plano Galego de Reactivación das Comarcas Mineiras de As Pontes e Cerceda, aprobado polo anterior goberno galego logo de importantes mobilizacións levadas a cabo polos traballadores/as das auxiliares do carbón. Este Plano contemplaba a recolocación dos traballadores/as afectados polo peche das explotacións mineiras e o impulso á diversificación industrial de ambas comarcas, aínda que polo momento a maioría do persoal continúa en situación de desemprego.