Delegados e delegadas da CIG de Compostela concentráronse esta mañá na parada de Autobuses de Calo para exixir a readmisión da condutora Nélida Pisco. Durante a concentración repartíronse panfletos nos que se informaba a traballadores/as e usuarios/as sobre as causas que provocaron o despedimento desta traballadora, que non son outros que solicitar unha redución de xornada, dereito recoñecido por Lei, para poder coidar da súa filla. Antes da concentración tamén se fixo un reparto polas paradas de autobuses do Milladoiro.

Os traballadores e traballadoras de Aquagest e as centrais sindicais CIG e UGT veñen de anunciar, en rolda de prensa, a convocatoria de folga indefinida a partir da Semana Santa para exixir a paralización da política de despedimentos que vén de pór en marcha a empresa, a readmisión dos traballadores despedidos até o de agora e o desbloqueo da negociación colectiva. A folga afectará a arredor de 500 traballadores/as e a máis de 40 concellos como Santiago, Pontevedra, Ourense, Barbanza, Carballo, Laracha, Betanzos, Sada, Ribadeo ou Ribeiro, entre outros.

As traballadoras de Limpezas Ames, en folga desde o pasado día 9 de febreiro, concentráronse diante do concello de Ames e asistiron ao pleno para manifestar o seu malestar polo mantemento da concesión do servizo de limpeza a esta empresa e para exixir o cobro dos salarios que se lles adebedan.

Nélida Pisco, condutora de Autobuses de Calo (Hedegasa), foi finalmente despedida pola empresa, logo de ter sufrido un rosario de discriminacións e ameazas por exixir o cumprimento da lei de Igualdade. Pisco solicitou, logo da baixa por maternidade, unha redución de xornada por coidado de fillos, as horas de lactación e o desfrute das vacacións que tiña pendentes, todos dereitos que lle foron denegados. A cambio conseguiu, antes de ser despedida, que a empresa a deixara sen traballo efectivo, que se lle prohibira o uso dos lugares comúns dos condutores e verse obrigada a pasar a xornada laboral no seu coche particular no exterior da nave. Todo isto, ás portas do 8 de marzo.

O traballador de Correos que se reincorporou onte ao se posto de traballo e que se viu obrigado a repartir paquetes malia ter que usar muletas, tiña a correspondente baixa médica emitida polo seu médico de cabeceira, pertencente ao cadro facultativo de MUFACE.

CIG-Correos denuncia que a empresa deu a alta médica a un carteiro de Santiago, malia non estar recuperado das doenzas provocadas por dous accidentes laborais anteriores. O traballador incorporouse esta mañá (día 23 de febreiro) ao traballo e desde a dirección de Correos enviárono a repartir paquetes sabendo que para camiñar depende dunhas muletas. Por iso, desde CIG-Correos convocouse unha concentración este martes diante da Dirección territorial de Correos en Galiza, na Rúa Pitelos, en Santiago de Compostela.