Coincidindo coa celebración do Consello da Xunta e tras da publicación no DOG da nova RPT pola que se despedía a 59 traballadores e traballadoras da Administración pública, as organización sindicais con representación na  Mesa Xeral de Emprego Público de Galiza convocaban concentracións diante dos principais edificios administrativos para manifestar a súa oposición ás amortizacións, destrución de emprego e consecuente deterioro dos servizos públicos.

O persoal do CHUS segue a reclamar a aplicación dos criterios de igualdade, mérito e capacidade para o acceso ás prazas e que estas non sexan designadas “a dedo”, de forma arbitraria, por parte da xerencia ou dirección de enfermería. Por iso volveu a concentrarse esta mañá diante do edificio do Sergas e anuncia que valorará unha inminente convocatoria de folga nos quirófanos a fin de seguir coas mobilizacións.

Máis de 2.000 rapaces e rapazas percorreron as rúas de Compostela nunha nova edición do Correlingua baixo o lema “Galego, a chave do mundo”. A carreira rematou cunha festa final conducida polo actor Pepe Penabade e a lectura do manifesto gañador do Correlingua, que correu a cargo do alumnado do IES Antón Fraguas. A actuación musical de Monoulious Dop, banda gañadora do concurso Cantalingua, pechou o acto.

Empregados e empregadas da Xunta de Galiza concentrábanse na mañá deste martes en San Caetano para denunciar os despedimentos e a destrución de emprego público que esta semana se vai facer efectiva, unha vez se publique a modificación da Relación de Postos de Traballo no Diario Oficial de Galiza. Na mobilización, convocada polas centrais sindicais presentes na Mesa Xeral de Emprego Público en Galiza denunciáronse tamén as consecuencias que, nas condicións laborais do persoal das administracións públicas de Galiza, terá a Lei de Emprego Público que pretende aprobar o Partido Popular.

As catro organizacións sindicais presentes na Mesa Xeral de Emprego Público (CIG, CCOO, UGT e CSIF) convocan unha concentración, este martes, día 14 de maio, ás 12:00 horas, na explanada da cafetería do edificio administrativo da Xunta de Galiza, en San Caetano, para denunciar os despedimentos e a destrución de emprego público que esta semana se vai facer efectiva, unha vez se publique a modificación da Relación de Postos de Traballo no Diario Oficial de Galiza.

Traballadoras e traballadores de AENA de Lavacolla percorrían este venres as instalacións da nova terminal, ao son do bombo, para denunciar que o Plan de Viabilidade a aplicar no aeroporto provocará a supresión de 31 postos de traballo. A sección sindical da CIG denuncia que isto reducirá o cadro mínimo operativo previsto para o normal funcionamento do aeroporto compostelán nun 20%. Por iso fai un chamamento a todas as organizacións sindicais a unir forzas para frear esta ERE encuberto e non agardar a que sexa demasiado tarde.

A CIG-Saúde denuncia que a dirección do CHUS vén de realizar diversas coberturas de postos de enfermería “a dedo” a persoas que carecen da titulación requirida. Unha situación que, asegura, ten provocado o malestar do persoal  e contra a que vén convocando concentracións estes últimos venres. A pasada semana remitiu, ademais, un escrito á Dirección de Recursos Humanos da Xerencia Integrada e do Sergas para que explique as razón que levaron a tomar esta decisión vulnerando o código ético do CHUS.