A CIG-Servizos de Ferrol ten convocada para a tarde deste venres, 12 de marzo, concentracións diante das piscinas da Malata e de Narón para esixir a readmisión de dous traballadores que foron despedidos como represalia por ter participado na folga de instalacións deportivas, que vén de suspenderse.

A CIG-Servizos de Ferrol vén de amosar a súa desconformidade co informe transmitido polo Concello a respecto da actuación das empresas concesionarias das instalacións deportivas durante o decurso da folga no sector, xa que a central entende que si existiu neglixencia e dolo por parte das compañías, polo que se solicitou que se esixan responsabilidades, que se produzan as correspondentes sancións, así como a readmisión da traballadora despedida durante o paro.

A V asemblea comarcal da CIG de Ferrol elixía na mañá deste sábado á nova Executiva comarcal (agora conformada por oito persoas) e os membros que formarán parte do Consello Confederal, de entre as dúas candidaturas encabezadas por Xesús Anxo López Pintos e Manuel Grandal Anca, obtendo cada unha delas catro representantes para a dirección comarcal e tres para o máximo órgano de goberno da CIG. No proceso, por mor dun acordo previo, Pintos e Grandal quedaron nomeados como voceiros da CIG de Ferrol durante os vindeiros catro anos. Durante a V Asemblea, que se desenvolveu baixo o lema “Fronte a crise, Unidade e Loita” tamén se procedeu ao debate do Informe presentado pola Executiva saínte, que resultou aprobado con 134 votos.

O sector de Transporte da CIG denunciou esta mañá publicamente a tentativa criminal contra o delegado sindical da central en Ambulancias do Eume ao que hai unhas semanas lle manipularon á roda do seu vehículo particular coa intención clara de provocarlle un accidente. Afortunadamente o delegado non sufriu danos, pero tres mecánicos confirmaron que as torcas do coche foran afrouxadas dun xeito intencionado. Os feitos xa foron postos en coñecemento da Garda Civil, que está a realizar investigacións.

Delegados e delegadas da CIG mantiveron esta mañá un peche na oficina do Servizo Público de Emprego de Ferrol e da delegación territorial da Xunta para denunciar a situación socioeconómica da comarca de Ferrolterra, a proposta de reforma laboral e das pensións anunciadas polo Goberno, así como a actitude mantida por CCOO e UGT diante desta situación, actuando como cómplices das tentativas de recortar os dereitos da clase obreira e apoiando a perda do poder adquisitivo dos salarios.

Os traballadores de Inclima, empresa de frío industrial asentada en Narón, levan tres días en folga para reclamar o pagamentos dos atrasos salariais e a rescisión dos seus contratos. A empresa, que se atopa nunha situación económica problemática, leva sen facer fronte ás súas responsabilidade económicas cos 20 operarios dende o pasado mes de outubro, polo que a maioría do persoal tivo que recorrer á vía xudicial para solicitar a rescisión do contrato.