Un grupo de traballadores/as da empresa T-Solar de Ourense mobilizouse onte en Vigo convocados pola CIG e a CUT para rexeitar o ERE extintivo que afectará os 170 empregados/as da firma enerxética. Ás 11.00 horas concentráronse diante do Xulgado do Mercantil 3, onde a central nacionalista fixo entrega dun escrito no que se reclama a non extinción dos contratos xa que a firma recibiu axudas públicas condicionadas ao mantemento do emprego, e posteriormente ocuparon as oficinas do grupo Isolux, propietario da empresa.

A VI Asemblea Comarcal da Confederación Intersindical Galega de Ourense celebrada este sábado baixo o lema “O cambio social conquístase” reelixiu a Etelvino Blanco como secretario comarcal, ao tempo que renovou a Executiva e aprobou o Informe de Xestión presentado pola Executiva saínte. A candidatura de Blanco -que foi a única que concorreu ao proceso ao igual que no caso da Executiva e do Consello- acadou un total de 136 votos a favor e 10 en branco. Pola súa banda, os representantes da Executiva Comarcal foron elixidos por 133 votos a favor, 5 abstencións e 1 nulo.

A CIG-Metal vén de remitir escritos ás Consellerías de Economía, Traballo e Facenda reclamándolles que insten o Xulgado do Mercantil número 3 de Vigo a rexeitar a aprobación do ERE extintivo para 170 traballadores/as “en base a que as subvencións e axudas concedidas pola Administración autonómica estaban condicionadas ao mantemento do emprego até xuño de 2014”. A central nacionalista solicita tamén a certificación das axudas, avais e subvencións concedidas pola Xunta á empresa dende o seu inicio até a actualidade.

O secretario nacional da CIG-Metal, Xoan Xosé Bouzas Aboi, compareceu en conferencia de prensa xunto a membros da executiva comarcal da federación en Ourense e traballadores/as da empresa fotovoltaica T-Solar para anunciar o personamento da central nacionalista no proceso concursal e instar á Xunta a pular polo mantemento do emprego.

Traballadores/as de Amencer Reciclado de Ourense -empresa do grupo Aspanas que emprega a persoas con discapacidade física e intelectual- volveron mobilizarse hoxe, nesta ocasión diante do despacho do administrador único, para esixir o pago dos salarios pendentes e reclamar que o concurso de acredores da compañía sexa declarado culpábel. A presión dos afectados/as e a sensibilidade dos comuneiros/as evitou que a Xunta lle cedese á compañía o antigo hospital psiquiátrico de Toén.

Traballadoras e traballadoras de Amencer Reciclado fixeron na mañá deste venres unha toma simbólica do antigo Hospital de Toén para denunciar que continúan sen cobrar os salarios atrasados e as indemnizacións e en rexeitamento da decisión da Xunta de ceder as instalacións de forma gratuíta durante os próximos 50 anos ao grupo empresarial Aspanas –propietario de Amencer Reciclado-, logo de ter despedido a todo o persoal.

Traballadores/as de Amencer Reciclado e delegados/as da CIG realizaron este venres unha protesta no interior da xefatura territorial da Consellería de Sanidade en Ourense para rexeitar o despedimento de todo o cadro de persoal e denunciar que a Xunta lle vai ceder ao grupo empresarial Aspanas -propietario de Amencer Reciclado- o antigo hospital psiquiátrico de Toén de forma gratuíta a pesar de que a empresa continúa sen abonar os salarios pendentes.