O martes 8 de setembro tiña lugar unha rolda de prensa no local da UGT de Pontevedra na que o Comité de Empresa de Treves daba a coñecer o contido da reunión mantida co director da factoria de Citroen, Pierre Ianni, o 7 de setembro, asi como a convocatoria dunha nova xornada de folga prevista para o mércores 9 de outubro, e que volverá levar ás rúas de Pontevedra unha nova manifestación das traballadoras de Treves, que ás dez da mañá sairán desde a sede da súa empresa até o Edificio Administrativo da Xunta en Pontevedra, onde insistirán na necesidade da implicación da Administración para acadar unha solución para este conflito.

O director de PSA Peugeot Citroën en Vigo, Pierre Ianni, recibirá o luns 7 de setembro ao Comité de Empresa de Trèves, auxiliar de Citroën que anunciou o peche dunha das súas dúas naves -dedicada ao téxtil- situadas en Pontevedra. Este encontro, que terá lugar ás 20h00 no Club Financeiro de Vigo, responde a unha expresa petición dos traballadoras, para forzar a implicación de Citroën, como cliente da planta da multinacional francesa, no conflito con Trèves.

Desde as cinco e media da mañá as traballadoras e traballadores de Treves da Avenida de Vigo e do Campiño comezaban os piquetes desta xornada de folga polo mantemento do proxecto industrial de Treves nestes dous centros de traballo, e nomeadamente contra o ERE de extinción na Avenida de Vigo, que suporía o despedimento de 133 traballadoras. Despois, ás 10.30 da mañá, o persoal de Treves concentrouse na Praza de América, xunto a delegados/as sindicais da FGAMT-CIG, desde onde sairon en manifestación até ás portas de Citroen, o principal cliente desta auxiliar da automoción, para demandar o seu apoio contra a deslocalización de Treves.

O venres 29 de agosto tivo lugar no local comarcal da CIG de Pontevedra unha rolda de prensa para presentar o calendario de mobilizacións aprobado polas traballadoras e traballadores de Treves, que se concreta nunha folga para o martes 1 de setembro, data na que convocaron tamén unha manifestación desde a Praza de América, ás 10.30, até a planta de Citroen, onde está previsto que teña lugar unha xuntanza co Clúster da automoción e un representante de PSA. Na rolda de prensa tamén se analizaron as negociacións coa dirección da empresa e a Administración galega, que foi duramente crítica pola súa ausencia e inacción neste conflito.

Os traballadores da empresa Armarios Alonso, de Sanxenxo presentaron o luns 24 de agosto diante da Consellaria de Traballo un informe contrario ao ERE que afecta á totalidade do persoal e que se presentou, segundo a representación sindical, nunha situación de fraude de lei. De feito, a empresa deu por rematado o período de consultas e negociación sen comunicarllo aos seus empregados, e presentou este expediente de extinción despois de que os empregados denunciaran os seus despidos e a súa situación na Inspección de Traballo.

O sábado 21 de agosto tivo lugar unha asemblea de traballadoras e traballadores de Treves, cunha asistencia masiva, na que se analizou a situación das negociacións que tiveron lugar as pasadas semanas, e na que se debateu tamén a necesidade de retomar o proceso de mobilizacións. Esta asemblea aprobou a proposta da CIG de convocar un dia de folga en cada semana no mes de setembro. A primeira data para esta convocatoria de folga será o 1 de setembro, coincidindo cunha xuntanza que manterán ás 12.30 da mañá a representación sindical co Clúster da Automoción, na Zona Franca de Vigo.

A CIG-Construción de Pontevedra denunciou que o dono da empresa Armarios Alonso de Sanxenxo rexeitou a proposta do delegado territorial da Xunta en Pontevedra para manter un encontro cos traballadores e coa presenza da administración autonómica como mediadora.