Organizacións sindicais de Europa, África e América acompañarán á CIG no seu VI Congreso, o que constata o recoñecemento internacional que a central sindical ten malia ser unha organización da clase traballadora dunha nación sen estado. Xunto ás delegacións das organizacións sindicais de distintos países participan tamén organizacións de carácter internacional como a FSM (Federación Sindical Mundial) e a CSPLP, (Confederação Sindical dos Países de Lingua Portuguesa).

Unha representación das Executivas da CIG e do BNG celebraron este martes unha reunión conxunta para avaliar a situación económica, social e laboral do país. Ao remate da xuntanza Xavier Vence e Suso Seixo manifestaron a coincidencia nas análises e a intención de ambas as dúas organizacións de impulsar mobilizacións para reclamar outras políticas económicas, industriais e financeiras. En concreto sinalaron a folga xeral comarcal convocada en Ferrolterra para o vindeiro 12 de xuño, unha convocatoria que, segundo adiantou Seixo, a CIG quere impulsar tamén en Vigo.

A vindeira fin de semana celebrarase en Compostela, o VI Congreso da Confederación Intersindical Galega, no que participarán un total de 682 congresistas: 540 delegadas/os elixidas/os polas distintas federacións nas comarcas; 136 membros do Consello confederal e 6 da Comisión de Garantías. Está xa confirmada a presenza de 25 delegacións internacionais. O lema escollido pola central sindical “É necesario. É posíbel. Organización, loita, soberanía”, sintetiza os principais elementos a debate.

Delegadas/os da CIG concentrábanse en distintas comarcas do país para denunciar que a pretensión dos sindicatos estatais de acadar un novo pacto social sentando con Mariano Rajoy e a patronal é unha fraude porque, até o de agora, eses acordos só supuxeron retrocesos de dereitos laborais e sociais. Fronte a iso, a central sindical demanda a dimisión do goberno e a convocatoria dun novo proceso electoral para que forzas políticas que están do lado da clase traballadora sexan maioría nos Parlamentos e que se muden as políticas antisociais e antiobreiras postas en marcha nos últimos anos.

A CIG participou na concentración convocada en defensa dos dereitos sexuais e reprodutivos da muller ás portas do Parlamento con motivo da presentación dunha Proposición non de Lei rexistrada polo BNG sobre a Contrarreforma da Lei do Aborto. Un debate parlamentar no que o Partido Popular se pronunciou abertamente a favor do Anteproxecto de lei de Modificación da Lei do Aborto impulsado por Gallardón, cos mesmos argumentos que os exhibidos polo movemento Hazte Oír, Derecho a vivir, iniciativas como Borra el aborto e organizacións financiadas con cartos públicos da Xunta de Galiza como é o caso de Red Madre.

Ante a crítica situación do emprego, a CIG demanda un “radical cambio nas políticas económicas dos gobernos do Partido Popular, en Galiza e no Estado”. Antonio López Rivera, secretario confederal de Emprego e Industria sinala que no pasado mes de abril rexistráronse 290.459 desempregados/as nas oficinas de emprego, apreciándose un “levísimo” descenso no paro de tan só o 0,25%. Porén, subliña que hai 12.463 desempregados/as máis que en abril de 2012, o que supón un incremento do 4,62%.

A seguridade e a saúde laboral, son dereitos fundamentais e polo tanto esenciais e innegociables para o conxunto da clase traballadora. Ámbolos dous conceptos van intimamente ligados e son directamente interdependentes das condicións de traballo establecidas. Neste senso, a actual reforma laboral do goberno do PP consagrouse coma unha elección política e ideolóxica, no marco dun modelo social e económico ultraliberal, que deixou de feito desprotexida e indefensa á maioría social traballadora, perante ao poder absoluto outorgado aos empresarios para desregular e impoñer de xeito unilateral as condicións de traballo nas relación laborais.