Tras coñecerse que Alberto Núñez Feijóo rexeita manter un encontro con Queremos Galego, representantes das diversas entidades que conforman a plataforma cívica, entre elas a CIG, e persoas a título individual concentráronse esta mañá na oficina de correos dos edificios administrativos de San Caetano, en Santiago de Compostela, para enviaren simbolicamente os primeiros dos 50.000 postais que desde hoxe e ao longo de todo o Nadal distribuirán masivamente en todas as comarcas galegas. Estender “a inmensa marea social en defensa do galego” por todo o país e “obrigar” o presidente cando menos a que escoite “o sentir dunha ampla maioría social” en defensa “do idioma de todas e todos”, eis os obxectivos que se marcan.

A CIG vén de iniciar unha campaña de recollida de sinaturas entre traballadores/as, seccións sindicais, comités de empresa e sindicatos en solidariedade coa activista saharauí Aminetu Haidar na súa loita pola Soberanía do Sáhara Occidental. O manifesto de apoio pódese asinar dixitalmente a través da web da CIG pinchando no banner superior da páxina de inicio ou a través do enlace que atoparás ao final desta nova.

CIG-Mocidade de Vigo iniciou o 13 de decembro unha serie de concentracións contra o consumismo e a explotación laboral no Nadal que leva por nome “Racha co consumismo, tamén é explotación laboral!”. A campaña está a ser difundida coa colada de 400 cartaces e co reparto de 3.000 follas informativas. CIG-Mocidade anima a non mercar os domingos e festivos e a deixar de acudir aos centros comerciais como unha forma de lecer.

O pasado domingo entrou en vigor a última reforma da Lei de estranxeiría, logo de que o pleno do congreso dos deputados, aprobara o 26 de novembro a reforma da Lei Orgánica sobre dereitos e libertades dos estranxeiros no Estado e a súa integración social, logo de introducir as enmendas do senado e proceder a votación conxunta do texto.

As federacións da Área Pública da CIG veñen de convocar unha concentración de delegados e delegadas para o vindeiro mércores, día 16 de decembro, ás 11:30 horas diante do Parlamento de Galiza baixo o lema “Polo cumprimento dos acordos. Non á perda do poder adquisitivo”. CIG-Administración, CIG-Ensino e CIG-Saúde denuncian que o goberno acordou cos sindicatos estatais unha suba do 0,3% e que o goberno da Xunta, pola súa banda, suspendeu os acordos retributivos sectoriais comprometidos coas organizacións sindicais.

Nunha carta enviada como resposta á solicitude de entrevista por parte de Queremos Galego, o presidente da Xunta rexeita reunirse cunha plataforma que conta co apoio de 600 entidades, entre elas a CIG, e que convocou unha das tres maiores manifestacións da historia democrática de Galiza, cunha participación estimada pola policía en 50.000 persoas e polos organizadores en 100.000.

A Confederación Intersindical Galega considera que as accións realizadas polos gobernos de Marrocos e do estado español a través dos seus axentes e autoridades actuantes directamente vulneran a legalidade internacional, a lexislación interna de ambos os dous países e os dereitos humanos de Aminetu Haidar, tal e como teñen manifestado diferentes gabinetes xurídicos, organizacións de defensa dos dereitos humanos e grupos de apoio á activista saharaui Aminetu Haidar.