As galegas e galegos botáronse á rúa nesta xornada de folga xeral. Literalmente. En moitos casos as e os manifestantes quedaron colapsados, sen poder moverse atrás ou diante. Noutros, a cabeceira chegara ao punto de remate, cando a cola non saíra do punto de partida. Así as cidades e vilas galegas, que abriron o día sen actividade algunha, coas industrias e os comercios pechados, foron un fervedeiro humano a mediodía na que foi unha xornada de folga xeral que a CIG cualifica de éxito rotundo.

A Sala do Contencioso-Administrativo do Tribunal Superior de Xustiza de Galiza resolveu, mediante un auto notificado na tarde deste martes, a petición da CIG de suspensión cautelar dos servizos mínimos acordados para a folga xeral do 14 de novembro, por seren desproporcionados e carentes de motivación. O alto tribunal galego critica que a Xunta demorase até dous días antes do comezo da folga a publicación no DOG dos servizos mínimos, o que dificulta a tutela xudicial do dereito fundamental.

O secretario xeral da CIG, Suso Seixo, mantivo esta mañá un encontro co portavoz nacional do BNG, Guillerme Vázquez, para analizar a crítica situación socioeconómica e laboral que padecen as traballadores e traballadores galegos e para facer un chamamento conxunto a participar masivamente na folga xeral do 14 de novembro, que a organización política nacionalista acordou apoiar e secundar. Seixo alertou da pretensión de rebaixar até nun 30% os salarios, so pretexto de favorecer a competitividade, e Vázquez acusou de “asasinos” a quen en defensa dos intereses da banca permiten os desafiuzamentos, que hoxe mesmo tiveron como consecuencia un novo suicidio en Barakaldo.

A cidade de Vigo é o escenario escollido pola CIG para celebrar a manifestación central das once convocadas por toda Galiza coincidindo coa xornada de folga xeral do vindeiro mércores 14 de novembro. Tal e como adiantaron hoxe os secretarios comarcais da CIG, CCOO e UGT en rolda de prensa, a marcha conxunta partirá da Praza dos Cabalos ás 11.30 horas para rematar en Praza América. Ademais, haberá mobilizacións en Pontevedra, Lugo, A Coruña, Ourense, Santiago, Ferrol, Vilagarcía, Burela, Ribeira e Monforte.

A CIG trasladou esta mañá a súa total oposición á proposta de servizos mínimos presentada pola Xunta de Galiza para a folga do día 14 de novembro por considerala arbitraria, desproporcionada e falta de motivación. A central sindical entende que con este borrador de servizos mínimos non queda garantido o lexítimo exercicio do dereito á folga do conxunto do persoal que traballa para a administración galega. Por iso, a central nacionalista advirte que, de non producirse un cambio substancial, presentará recurso contencioso-administrativo.

En Galiza ha xa un total de 267.812 persoas desempregadas. A cifra ascende a 285.196, se se inclúen o total de demandantes de emprego non ocupados (DENOS) que, aínda sendo parados/as, están realizando, por exemplo, un curso de formación e, polo tanto, non se computan. A CIG considera que estes datos son alarmantes, máis tendo en conta que un 42,1% das persoas desempregadas non están cobrando ningunha prestación. O panorama é, para a central sindical, desolador e o perigo de exclusión social e pobreza de miles de galegas e galegos é cada vez maior.

O pasado 30 de outubro publicábase no BOE o Real Decreto 1483/2012, de 29 de outubro, no que se desenvolve o procedemento de despedimento colectivo a aplicar nas administracións públicas (Real Decreto 1483/2012, de 29 de outubro).  Unha medida aprobada polo goberno do PP á que a Área Pública da CIG (CIG-Administración, CIG-Ensino e CIG-Saúde) manifesta a súa máis rotunda oposición, porque supón acelerar o proceso de desmantelamento dos servizos públicos e provocar unha masiva destrución de emprego. Por iso, fan un chamamento a todas as empregadas/os públicos a sumarse masivamente á folga xeral convocada para o vindeiro día 14 de novembro.