As organizacións sindicais CIG, CCOO, UGT e USTG de Ferrol veñen de anunciar a convocatoria de Folga Xeral Comarcal para o mércores 12 de xuño, ante a situación de “emerxencia total” que sufre Ferrolterra. Con motivo do paro xeral, que as centrais sindicais agardan sexa un éxito en contra das "nefastas políticas do goberno estatal e da Xunta", está convocada tamén unha manifestación que partirá ás 12:00 horas dende o Inferniño e rematará na Praza do Concello.

Milleiros e milleiros de persoas participaron hoxe nas manifestacións convocadas pola CIG en once localidades do país para conmemorar o Primeiro de Maio, Día Internacional da Clase Traballadora, unha data marcada pola masiva participación e polo rexeitamento das políticas antisociais e antigalegas do PP e da Unión Europea. O secretario xeral da central nacionalista, Suso Seixo, esixiu a dimisión dos Gobernos galego e español e lembrou que nos atopamos “nunha loita a longo prazo entre o capital e a clase traballadora polo modelo de sociedade do futuro” e que só con mobilización e capacidade de xerar alternativas “impediremos a consolidación deste capitalismo neoliberal ao servizo dunha minoría” e seremos quen de “conquistar un novo modelo ao servizo das clases populares”.

Ante as novas publicadas sobre a reforma da Lei do Aborto que prepara o Ministro de Xustiza, Alberto Ruíz-Gallardón, a Secretaría da Muller da CIG posiciónase, unha vez máis, contra do que considera un claro retroceso no recoñecemento dos dereitos sexuais e reprodutivos das mulleres, un recorte sen precedentes na liberdade e autodeterminación en relación á sexualidade das mulleres e sobre a libre decisión da maternidade.

A CIG manifesta o seu máis absoluto rexeitamento ás medidas anunciadas hoxe tras do Consello de Ministros. O secretario xeral, Suso Seixo, cuestiona un decreto que promove a permanencia no posto de traballo e o atraso da idade de xubilación, mentres a mocidade ten grandes dificultades para conseguir un emprego e se está a producir unha nova vaga migratoria. Considera especialmente alarmante a pretensión de deixar sen subsidio aos maiores de 55 anos e anuncia que o vindeiro luns reunirase o Secretariado Confederal para analizar, tanto estas medidas, como as que adoptará a central sindical ante esta nova agresión á clase traballadora.

Ábrese o prazo de entrega de solicitudes para as Residencias de Tempo Libre de Panxón e do Carballiño. As solicitudes faranse cubrindo o modelo oficial publicado no Diario Oficial de Galicia, nº 49, de data 11 de marzo de 2013, que se achega, e deben ser enviadas antes do domingo 24 de marzo, xunto coa fotocopia do documento de identidade ben ao FAX do local nacional da CIG (981 571 082) ben por correo electrónico a: iagocarreira@galizacig.net

Milleiros de persoas participaron este domingo nas manifestacións convocadas pola Confederación Intersindical Galega (CIG) en toda Galiza con motivo da conmemoración do 10 de Marzo, Día da Clase Obreira Galega. Fronte ás políticas neoliberais aplicadas polos distintos gobernos, que só sexan miseria e desemprego, a central nacionalista centrou as reivindicacións deste ano na defensa do dereito a un emprego digno, á negociación colectiva como ferramenta fundamental da clase traballadora e na defensa dos nosos dereitos nacionais. Para conseguir estes obxectivos, a central nacionalista insiste na necesidade de concienciarse, organizarse e loitar.