A finais de xuño de 2009 celebrábase o V Congreso da CIG. Desde aquela aprobáronse dúas reformas laborais; a reforma da negociación colectiva; a das pensións; a da Constitución; o copagamento sanitario; a lei de taxas xudiciais; recortes na sanidade e no ensino público; privatizacións de empresas e servizos públicos...A clase traballadora foi literalmente saqueada, provocando un retroceso impensábel, hai uns anos, nas súas condicións laborais, salariais e de vida. Os días 26 e 27 de maio deste ano que comeza terá lugar o VI Congreso. Facemos pois balance deste convulso período no que a CIG encabezou a mobilización social, cunha xeira de entrevistas que comezamos co secretario xeral, Suso Seixo.

A Secretaria de Relacións Internacionais da CGTP-Intersindical Nacional, Graciete Cruz, que participou en representación da central sindical portuguesa nun encontro coa CIG e ELA, considera que a situación económica e social da República Portuguesa empeorará aínda máis tras aprobarse un duro plan de recortes, vía orzamentos do Estado para 2012, para cumprir co plan de rescate imposto polo FMI, o BCE e a UE. Advirte que hipotecarán o desenvolvemento económico, xerarán máis pobreza e exclusión social. Fronte a isto defende a aplicación doutras políticas decididas desde e por Portugal. Para iso, a CGTP vén convocando multitudinarias mobilizacións nos últimos anos. Durante esta semana, do 20 ao 27 de outubro, unha “semana de loita”, e para o 24 de novembro, folga xeral.

O secretario xeral de ELA, Adolfo Muñoz, analiza o impacto da crise económica en Euskal Herria, as consecuencias que está a ter en materia de recortes sociais e laborais e as alternativas que ELA vén defendendo para mudar o actual modelo. Xunto a isto, manifesta o seu “optimismo” ante un proceso político que abre a vía para a normalización de Euskal Herria. Un optimismo no que encadra os emprazamentos do Grupo Internacional de Contacto, promovido por Brian Currin, que se reuniu este luns no Palacio de Aiete de Donostia. A entrevista foi realizada o pasado xoves, día 13 de outubro, en Compostela, a onde se trasladou para participar nunha xuntanza organizada pola CIG.

Boicote, Desinvestimento, Sancións son os tres eixos baixo os que xira a actividade da plataforma internacional BDS, que dende hai oito meses opera tamén na Galiza. Entrevistamos a Antón Gómez Reino, “Tone”, integrante de BDS-Galiza, quen explica os principios e obxectivos deste movemento.

Marianne Helfer (Suíza, 1977) é na actualidade unha das principais especialistas verbo o retorno dos emigrantes galegos a Galiza. En 2006 remata a carreira de Antropoloxía Social en Berna cun traballo verbo o retorno das e dos emigrantes galegos de Suíza a Galiza (bisbarra de Bergantiños, A Coruña). Colaborou coa Confederación Intersindical Galega na elaboración do primeiro libro monográfico dedicado á emigración galega a Suíza con motivo do L aniversario do inicio desa emigración (1960-2010). Convidada pola CIG en agosto de 2010, presentou o traballo en Carballo.