A AEPD (Axencia Estatal de Protección de Datos) dependente do Ministerio de Xustiza, dirixido por Francisco Camaño que visitará este sábado Galiza, autorizou a Vodafone para que poda deslocalizar os distintos servizos de atención ao cliente que dan traballo en Galiza a mais de 700 persoas subcontratadas por varias empresas de telemárketing.

Os traballadores e as traballadoras de Sykes Enterprises, SAU, situada no Polígono de Agrela, están chamados a secundar os paros e as concentracións que a CIG ten convocadas para os días 9, 15 e 23 de febreiro, logo de que a empresa de telemárketing anunciase despedimentos masivos. Cos paros, que terán unha duración de media hora por cada unha das quenda, agárdase que a empresa retire os despedimentos previstos e retome as negociacións para acadar un plano que garanta a continuidade do emprego e o futuro deste importante centro de traballo.

O pasado venres día 29 de xaneiro, a Dirección de Caixanova comunicaba que 200 persoas dos  Servizos Centrais serán formadas para poder pasar a rede de oficinas, segundo explicaban, para “reforzar temporalmente a rede comercial” desde febreiro a decembro. Da súa explicación despréndese que aplicarán a mobilidade xeográfica e funcional prevista no Convenio e que a CIG sempre rexeitou, tanto nos convenios asinados por outros, como agora que pretenden aplicala. Desde a Dirección da entidade aseguraron que se remitirá unha comunicación individual, pero a federación de Banca da CIG entende que estamos ante unha medida de carácter colectivo.

Delegados e delegadas da CIG-Banca desenvolveron na mañá do xoves 28 de xaneiro dúas concentracións simultáneas diante das oficinas principais do BBVA nas cidades de Ourense e A Coruña para denunciar a desregulación dos horarios de traballo que a entidade pretende levar adiante. A falta de regulación da xornada é un problema que está afectando á maior parte do sector da banca, que a cambio de pechar as oficinas os sábados pola mañá pretende estabelecer un flexibilidade horaria absoluta. Por esta razón, a protesta celebrada en ambas cidades tamén se trasladou até as portas das oficinas doutras entidades bancarias.

Diante da presentación dos resultados da auditoría a Caixa Galicia e Caixanova, presentado esta mañá pola conselleira de Facenda, e á espera de coñecer o contido da mesma, a CIG solicitou a apertura inmediata dun proceso de negociación destinado a minimizar o impacto sobre o emprego que vai supor a fusión das dúas entidades, así como para homologar e garantir as condicións laborais do persoal. Dende a CIG tense denunciado que o persoal das caixas de aforros deberá asumir as consecuencias dunha xestión cuestionábel por parte das direccións, ante as que tamén se esixirán medidas.

O venres 15 de xaneiro ás 11.30 da mañá tivo lugar unha rolda de prensa convocada pola comarca de Vigo da CIG para clarificar a postura da CIG diante da cuestión das caixas, diante das numerosas novas que sobre este tema apareceron nas últimas semanas nos medios de comunicación. Asi, compareceron o secretario comarcal da CIG de Vigo, Serafín Otero e Clodomiro Montero, secretario nacional da CIG-Banca.