O mércores 17 de marzo comparecían diante dos medios de comunicación o secretario nacional da CIG-Construción, Xoán Xosé Melón, Alberte Fernández, secretario comarcal da CIG-Construción en Vigo, e Xulio Vicente, da Executiva Nacional desta federación. Para dar a coñecer a convocatoria de novas accións de mobilización, responder ás declaracións do alcalde de Vigo sobre a súa responsabilidade nas obras do Auditorio e no que alí poda acontecer, asi como para valorar a acción de paralización das obras do Auditorio, convocouse esta rolda de imprensa.

Ás 16 horas do martes 16 de marzo os traballadores e delegados/as da CIG que estaban ocupando as obras do Auditorio en Beiramar decidiron abandonar este espazo, xa que o obxectivo de paralizar as obras en toda a xornada, facer unha asemblea con todo o persoal, e informar sobre os incumprimentos do convenio que nesta obra se dan xa se conseguira. O mércores 17 ás 11.30 comparecerán diante dos medios de comunicación no local da CIG de Vigo ara dar a coñecer a convocatoria de novas accións de mobilización, responder ás declaracións do alcalde de Vigo sobre a súa responsabilidade nas obras do Auditorio e no que alí poda acontecer, asi como para valorar a acción desta xornada.

Os traballadores/as de Levantina (antigo grupo Graninter) continúan adiante co calendario de mobilizacións diante da sede desta firma no Polígono da Granxa, en O Porriño, para protestar pola pretensión da dirección da empresa de trasladar, forzosamente, a sete traballadoras/es de administración a Alacant. Este venres 12 de marzo está convocada unha concentración dende as 14 ás 14:30 horas e xa se estudan novas mobilizacións en contra do desmantelamento da factoría.

Os traballadores e as traballadoras da Vidreira do Atlántico acudían o mércores 10 de Marzo ao Xulgado do Social número 3 de Ourense, onde ía ter lugar a vista pola demanda de extinción dos contratos de máis de 75 empregados/as da factoría limiá. Na vista quedou demostrado que o proceso de concurso de acredores foi inducido polo Grupo ao que pertence a fábrica e que se produciu unha violación sistemática, no último ano, dos dereitos fundamentais dos traballadores/as, polo que dende a CIG e o persoal se solicita unha indemnización de 45 días por ano traballado, máis outra indemnización complementar por vulneración de dereitos. Dende a CIG de Verín destacan tamén que, durante o xuízo, os administradores concursais ratificaron nas súas declaracións os argumentos esgrimidos pola parte social, cualificando de fraudulenta a actuación da empresa.

A CIG de Valdeorras fai público, unha vez máis o seu rexeitamento á decisión de CAFERSA de rescindir contratos. Con falsas promesas de renovacion para dentro duns meses, e novos contratos a familiares destes, se os traballadores e traballadoras lle asinan o finiquito. Denuncian desde a Unión Local de Valdeorras a "complicidade dalguns sindicatos, pero afortunadamente non todos os traballadores/as tragan con estas estafas e moito menos a CIG desta localidade".

O Tribunal Superior de Xustiza de Galiza vén de invalidar o pronunciamento que o Xulgado do Social número 1 de Ourense realizara sobre o plus de actividade no marco do conflito colectivo presentado sobre a legalidade ou non da xornada imposta pola empresa en xaneiro do 2009. A sentenza do TSXG vén dar a razón aos argumentos manexados pola CIG e os traballadores/as, quen no seu día denunciaron a incrongruencia das consideracións xudiciais sobre uns feitos que se estaban a dirimir no ámbito laboral.