A Inspección de Traballo está a realizar unha investigación sobre os nomeamentos de profesorado substituto durante o verán de 2008, que poderían supor a reclamación aos traballadores/as afectados do diñeiro percibido pola prestación de desemprego e a anulación da cotización á Seguridade Social deses meses. A actuación da Inspección responde as melloras laborais recollidas no acordo do ano 2006 polo que o profesorado substituto que acumulase cinco meses e medio de contrato conseguía o dereito a un nomeamento durante o mes de xullo e os días pertinentes de agosto. 

Durante o Consello Escolar, celebrado este xoves 8 de outubro, no que estaba previsto ditaminar 4 modificacións de currículos de ciclos formativos aprobados o pasado curso, a CIG presentou unha emenda contraria a eliminación do módulo de “Cociña Galega de Vangarda” do currículo Ciclo Medio de Cociña e Gastronomía. Esta emenda foi apoiada maioritariamente polos membros do Consello Escolar de Galiza (14 a favor da emenda, 7 en contra e 3 abstencións) polo que no seu ditame rexeitase a pretensión da Consellaría de profundar na desaparición da realidade galega dos contidos educativos.

O Consello Escolar de Narón acordou manifestar publicamente o seu rexeitamento ao programa de gratuidade de libros de texto para este curso 2009-2010 posto en marcha pola Consellaría de Educación. A decisión foi adoptada na sesión celebrada este martes 6 de outubro a proposta da CIG-Ensino.

Profesores/as e delegados sindicais continúan na xornada do martes 6 de outubro o peche na Escola Oficial de Idiomas de Ferrol para reclamar a retirada da circular 5/2009 e o inicio de negociacións na Mesa Sectorial. O peche permanecerá activo até as 7:00 horas do mércores cando tomará o relevo o centro de Pontevedra.

Profesores/as e delegados/as sindicais iniciaban por volta das 7:00 horas do luns 5 de outubro un peche na Escola Oficial de Idiomas de Ferrol para exixir a retirada da circular 5/2009 emitida pola Consellaría de Educación o pasado mes de xullo. A medida de protesta estenderase a outros centros do País até o vindeiro 22 de outubro e vai acompañada dunha serie de accións a prol da retirada da circular, que pasan pola recollida de sinaturas entre profesores/as e alumnos/as, resolucións dos claustros e Consellos Escolares ou a declaración de persoas non gratas ao Conselleiro de Educación e ao Director Xeral de Educación.

A Secretaría Xeral para o Deporte e a Consellaría de Educación solicitaron, a través dunha circular, a colaboración do profesorado para pór en marcha o programa XOGADE “Xogos Galegos Deportivos Escolares”. A cambio, a administración comprometíase a compensalos cunha redución  máxima de tres horas semanais do seu horario de permanencia no centro. Porén agora, tanto o Servizo de Inspección como a Secretaría Xeral para o Deporte negan esa posibilidade. Por iso, a CIG exixe seriedade por parte da administración e o cumprimento dos seus compromisos.

A CIG-Ensino está a detectar en diferentes centros que, a estas alturas do curso, hai alumnado que aínda non ten libros de texto para utilizar nas aulas, feito que, ademais de dificultar a marcha normal das clases, discrimina a aqueles alumnos e alumnas procedentes de familias cun nivel de renda baixo.