Os mariñeiros da flota cefalopodeira galega en Mauritania animan á cidadanía a participar na manifestación do venres 24 en Marín para reclamar un novo acordo pesqueiro entre a UE e o país africano que lles permita regresar ao traballo. Unha representación dos afectados e da CIG-Mar manterá unha xuntanza co alcalde de Pontevedra para solicitarlle o seu apoio a unha marcha que partirá da Alameda ás 20.30 horas.

Os traballadores e traballadoras de Alimentos Lácteos realizaron este martes unha concentración diante do edificio da Deputación de Lugo para esixir unha solución á factoría, aproveitando a visita do Vicepresidente e Conselleiro de Presidencia, Administracións Públicas e Xustiza, Alfonso Rueda, co cal puideron manter unha breve entrevista e ao que lle reclamaron que explique cales son os condicionantes que están a impedir a posta en escea dunha solución definitiva para a planta.

Os traballadores/as de Alimentos Lácteos, inmersa nun proceso de suspensión da totalidade dos contratos, mantiveron este luns unha nova asemblea nas instalacións da factoría, na que repasaron a situación actual, “sen que se puidera observar algún asomo de vida ou implicación no que ao papel da Xunta de Galiza afecta”.

O alcalde de Bueu e os grupos municipais de Marín confirmáronlle á CIG-Mar e aos mariñeiros da flota cefalopodeira en Mauritania o seu apoio á manifestación convocada o venres 24 de maio para reclamar un acordo entre a UE e o país africano que permita faenar aos barcos galegos. A marcha partirá da Alameda de Marín ás 20.30 horas.

Na mañá deste xoves, o Comité de empresa de Alimentos Lácteos compareceu nas instalacións da factoría en Outeiro de Rei para a reunión semanal coa dirección e que, neste caso, era previa á reunión que mantería posteriormente a dirección da empresa co Consello de Administración da mesma. Porén, continúase sen novidades e sen maior información por parte da Xunta de Galiza para unha solución, “quen promoveu e orquestrou até o de agora todos os movementos que se xulgaban precisos para a solución na empresa”.

A CIG de Lugo realizou este xoves unha concentración solidaria cos sete traballadores/as despedidos da Panadería Bollería Majufer, aos que a empresa aínda non abonou as contías correspondentes á liquidación e a indemnización, “obrigando así ao persoal a recorrer a vía xudicial para conseguir o pagamento dos seus salarios”.

O martes, os/as traballadores/as de Alimentos Lácteos volvían unha vez máis a Santiago de Compostela para tentar arrincar unha resposta favorábel por parte do Goberno galego para o proxecto de negocio, primeiro na reunión co responsábel de XesGalicia e despois no propio Parlamento. Porén, malia a proximidade da entrada no concurso de acredores, do cumprimento cos requisitos marcados pola administración e das distintas iniciativas presentadas no Pazo do Hórreo, o persoal regresaba a Outeiro de Rei coas mesma incerteza e “sen que existan perspectivas, datas significativas ou pasos definitivos a concretar nesta semana ou na que vén”.