O persoal da Cruz Vermella segue coas mobilizacións para rexeitar o peche do hospital, nesta ocasión o mércores 3 de marzo concentráronse diante do edificio da Xunta e posteriormente encadeáronse diante da Dirección Provincial do SERGAS.

O martes 2 de marzo celebrouse en Pontevedra un acto público organizado pola Plataforma contra a Privatización e polo Hospital Único de Pontevedra, esta Plataforma está composta por entidades representativas da Área Sanitaria pontevedresa, nace para reclamar a continuación dos plans de creación do Hospital Único de Pontevedra mediante a ampliación de Montecelo.

Ás once da mañá tiña lugar unha nova rolda de prensa do Comité de Empresa do hospital da Cruz Vermella de Vigo, na que abordaron o estado das negociacións coa Cruz Vermella en Madrid, asi como un importante informe económico contrario ao expediente de regulación presentado, entre outros documentos que salientan que non existen razóns económicas para fechar este centro de saúde, máis alá da vontade desta "ONG" de deixar a atención sanitaria e pechar con razón ou sen ela. Tamén anunciaron a convocatoria de novas mobilizacións para esta semana.

O persoal da Cruz Vermella de Vigo entregou o venres 26 de febreiro mais de oito mil sinaturas na Dirección Provincial do Servizo Galego de Saúde en Vigo en protesta polo peche do centro asistencial. Estas sinaturas somadas ás mais de seis mil apresentadas anteriormente suman un total de case quince mil recollidas ata o momento.

A Sección Sindical de CIG-Saúde de Lugo vai desenvolver unha xornada o vindeiro 3 de marzo a respecto do proceso de privatización da sanidade pública iniciado polo goberno da Xunta. A xornada terá lugar no salón de actos de Caixa Galicia dende ás 19 horas até as 21:30 horas.

A Plataforma pola Defensa Da Sanidade Pública presentou o venres 26 de febreiro dezaseis alegacións ao Documento de Viabilidade Económico-Financieiro do Proxecto do Novo Hospital de Vigo. Rexeitan o modelo de Concesión Administrativa de obra pública tipo PFI (Iniciativa de Financiación Privada) que deixa á iniciativa privada a financiación e a construción do Hospital e a explotación e xestión de servizos non clínicos e áreas comerciais autorizadas. Ratifican a exixencia de voltar a un modelo de financiación e xestión públicos, propio do Servizo Galego de Saude.

Pouco despois das oito da tarde foi cando a chuvia deu unha tregua e a manifestación convocada pola Xunta de Persoal do Chuvi podia comezar a súa mobilización. Despois dunha xornada de folga na que conseguiron paralizar a actividade ordinaria dos hospitais do Chuvi, saían ás rúas da cidade olívica para demandar unha sanidade pública e que non se privatice o novo hospital de Vigo.