O hospital Meixoeiro de Vigo foi escenario hoxe dunha concorrida mobilización en solidariedade cos traballadores/as da cafetería, xestionada pola empresa Oh! Vigo. Dende a CIG-Servizos denuncian que propietario pretende abrirlle un expediente sancionador ao delegado sindical e continúa sen abonar as pagas que adebeda.

Este martes celebrouse a segunda das reunións do período de consultas aberto pola dirección de La Voz de Galicia coa intención de inaplicar parte do convenio en vigor. O Comité sinala que a empresa “non mostrou vontade críbel de modificar a súa plataforma inicial”: a Proposta do 66 % e que tampouco pechou a porta aos despedimentos baseados na disposición adicional primeira do convenio que se discute na AGA. O comité solicita a retirada da proposta porque entende que o informe foi elaborado ‘ad hoc’ para xustificala.

O Comité Intercentros vén de convocar a traballadores e traballadoras da Voz de Galicia á primeira xornada de loito no marco do período de consultas aberto pola empresa para a inaplicación do Convenio Colectivo. Unha xornada que coincide coa reunión que manterá este martes o comité coa empresa e para a que convida ao persoal a acudir a traballar, tanto nas redaccións como fóra delas, ataviados/as de negro como forma de manifestar a opinión que lle merece a proposta empresarial.

A folga e mobilizacións dos traballadores e traballadoras de Darty quedaron desconvocadas logo de que se acadase un preacordo entre empresa e a parte social, que deberá ser ratificado nas asembleas do persoal que se van celebrar este xoves. O principio de acordo mellora substancialmente as cativeiras condicións económicas das indemnizacións coas que a multinacional pretendía liquidar o persoal de todos os estabelecementos que posúe no estado español.

Delegados/as da CIG-Servizos desenvolveron hoxe unha protesta diante dunha das tendas de Mariel Boutiques en Vigo para reclamar o pago dos salarios e da indemnización que o propietario lle adebeda a unha traballadora que despediu despois de que denunciase a modificación substancial das condicións laborais. Os problemas da empregada, que se atopaba de baixa por acoso laboral cando foi despedida, comezaron cando solicita a redución de xornada para o coidado dunha filla.

As traballadoras e traballadores de Star Center, dedicada á venda de electrodomésticos e situada en Narón, protagonizaron este martes unha concentración diante das instalacións da empresa no Polígono da Gándara en rexeitamento ao despedimento de sete compañeiras e para esixir o cobro das tres nóminas que se lles adebedan.

A CIG-Servizos de Ferrol realizou na mañá deste martes unha concentración ás portas do comercio que a firma Emilio Iglesias ten na Estrada de Castela en protesta polo despedimento dunha traballadora, que tamén é delegada de persoal pola central nacionalista.