Unha ampla representación dos catro comités provincias da empresa pública SEAGA compareceron en rolda de prensa para pedir a máxima prudencia na información que se está a proporcionar respecto do incendio forestal de Fornelos de Montes, no que faleceron dous traballadores dos equipos de extinción; denunciar a precariedade das súas condicións laborais, con equipos de protección individual inaxeitados para o labor que desenvolven, sen que se garanta a formación necesaria e con contratos que en moitos casos non superan os 20 días. Desta situación responsabilizaron á Xunta de Galiza e a un modelo no que se concibe a extinción como un negocio, priorizando o aforro de custos fronte á prevención.

A asemblea de traballadores e traballadoras do servizo de limpeza viaria de Sada acordou a primeira hora desta mañá suspender temporalmente a convocatoria de folga en demanda dun novo convenio colectivo. A decisión chegou logo da fracaso da xuntanza celebrada a tarde do luns entre representantes do persoal e da empresa, a instancias do rexedor local, e tras coñecerse o decreto da alcaldía que estabelece uns servizos mínimos abusivos, que na práctica impiden o exercicio do dereito á folga.

Os traballadores e traballadoras do servizo de limpeza viaria e de praias do Concello de Sada, adxudicada á empresa Urbaser, comezarán a partir de mañá, xoves 24 de agosto, unha folga indefinida de non acadarse un compromiso satisfactorio na xuntanza convocada polo alcalde do municipio para este luns ás 17 horas.

A Inspección de Traballo sancionou con 8.200 euros á compañía Urbaser Ferrol por realizar a recollida do lixo cun único operario/a na parte traseira dos camións. Dende a CIG-Servizos da cidade departamental -promotora xunto co comité de empresa das denuncias que motivaron a actuación da autoridade laboral- critican que a compañía concesionaria do servizo municipal de recollida de residuos sólidos urbanos xa anunciou que pagará a multa pero non fará nada para corrixir esta ilegalidade. A central nacionalista denunciara con anterioridade a pasividade da Inspección e do Concello de Ferrol diante irregularidades cometidas pola empresa.

A CIG-Autonómica esixe que se depuren responsabilidades pola morte dos dous brigadistas que traballaban na extinción dun lume na localidade pontevedresa de Fornelos de Montes. Dende a central nacionalista lembran que os membros destas cuadrillas traballan en condicións pésimas e poñendo en risco a súa vida e reclaman demisións, tanto no departamento de Medio Rural como na cadea de mando da empresa pública Seaga. Arredor dun cento de delegados/as sindicais e compañeiros dos falecidos concentráronse este luns 16 de agosto na delegación da Xunta en Pontevedra en solidariedade coas familias dos dous traballadores.

A federación de Servizos da CIG da Coruña denuncia as represalias que están a sufrir por parte da empresa algúns dos traballadores/as que participaron o ano pasado na folga de instalacións deportivas. O sindicato nacionalista sostén que Sidecu, a compañía encargada da xestión do polideportivo de San Diego e das piscinas de Oleiros e Perillo, entre outras, está a someter o persoal a unha presión continua e nas últimas semanas levou a cabo varios despedimentos, o último deles improcedente.