Fomento de Construcciones y Contratas, concesionaria da limpeza viaria do Barco de Valdeorras, despediu a dúas empregadas despois de que rexeitasen traballar en domingo baixo as condicións impostas pola empresa e tampouco accedesen a custear dos seus petos a obtención do carné de camión . Dende a CIG da localidade ourensá lembran que a categoría profesional das operarias é a de limpadora e posúen unha antigüidade de máis de 15 anos neste servizo municipal xa que son persoal subrogado ás distintas concesións que o Concello levou a cabo neste tempo.

A CIG-Servizos rexeita o novo convenio do comercio téxtil da provincia de Pontevedra ao entender que o documento non contempla os obxectivos marcados polos sindicatos trala xornada de folga do pasado 1 de xullo, coincidindo co primeiro día de rebaixas. A central nacionalista critica tamén os incumprimentos en materia salarial e o feito de que o texto non fose sometido á asemblea de traballadoras e traballadores.

Arredor dun cento de traballadoras/es da limpeza dos colexios e comedores escolares de Vigo realizaron na mañá de hoxe un peche na Concellería de Educación para forzar unha reunión coa responsábel municipal que levan tempo solicitando. As operarias denuncian que os cambios introducidos no prego de condicións para a nova adxudicación do servizo incumpren o convenio colectivo. Dende a CIG-Servizos, sindicato maioritario no comité de empresa, critican que a xuntanza non servise para corrixir unha situación que pode derivar nun grave conflito no mes de setembro.

Traballadores e traballadoras de Pull&Bear Loxística concentráronse na tarde do martes 20 de xullo diante das instalacións da empresa no Polígono de Río do Pozo, Narón, para denunciar a falta de avances na negociación colectiva, iniciada o pasado mes de xaneiro. Diante do inmobilismo da empresa, que propón unha oferta económica escasa, o persoal acordou comezar un calendario de protestas a partir do vindeiro mes de setembro.

Vixilantes da seguridade privada de todo o País concentráronse esta mañá diante do edificio do IKEA en A Coruña, coincidindo coa inauguración do primeiro estabelecemento da cadea sueca en Galiza. A protesta, convocada pola CIG-Servizos, retoma así as mobilizacións que os traballadores/as do sector veñen realizando dende hai máis de ano e medio en demanda dun convenio digno e con dereitos e cuxa negociación está paralizada dende hai meses.

A CIG recorrerá xudicialmente o novo despedimento dun bombeiro do Parque Comarcal do Morrazo ao entender que se trata unha vez máis dun claro caso de represión sindical. CeltaPrix, a empresa encargada da xestión do Parque, comunicou a rescisión do contrato días despois de que a Inspección de Traballo incoase un expediente administrativo á empresa ao constatar graves ilegalidades e irregularidades no que respecta ao cumprimento do convenio e as condicións de traballo. A compañía vén sancionando de forma reiterada dende 2009 tanto os delegados como os empregados máis activos na reivindicación dun convenio colectivo digno.