Coincidindo coa vista do xuízo polo despedimento dunha delegada da CIG na residencia da terceira idade de Geriatros en Laraxe (Cabanas), delegados e delegadas da central desenvolveron unha concentración silenciosa diante dos xulgados para reclamar xustiza para esta traballadora, despedida por defender os dereitos dos seus compañeiros e compañeiras. Durante a vista, as testemuñas achegadas pola empresa incorreron en numerosas contradicións pondo en evidencia as acusacións formuladas dende Geriatros.

Representantes da federación de Servizos da CIG e de CCOO e traballadores/as do sector pecháronse na Residencia da Terceira Idade de Mapfre Quavitae en San Lázaro (Santiago de Compostela) para denunciar o despedimento de 4 traballadores/as e o anuncio da dirección de proceder a máis despedimentos nos vindeiros días.

A folga convocada no sector do comercio téxtil tivo un seguimento masivo en toda a provincia de Pontevedra, especialmente nas cidades de Vigo e Pontevedra. A CIG cifra nun 80% os establecementos que pecharon as portas o primeiro día de rebaixas para protestar polo bloqueo no convenio colectivo motivado polo inmobilismo da patronal.

A Xunta de Galiza vén de destruír seis postos de traballo ao prescindir do servizo de seguridade, conserxería e mantemento do Centro de Innovación e Servizos do Deseño e a Tecnoloxía de Galiza, situado en Ferrol e dependente dunha Fundación da administración galega. Dende a CIG-Servizos denuncian que a Xunta pretende reducir gastos suprimindo empregos e “comezando polo anel máis feble da cadea, as traballadores e traballadoras das subcontratas”.

As traballadoras e traballadores do sector do comercio téxtil da provincia de Pontevedra participarán na xornada de folga convocada polos sindicatos CIG, CCOO e UGT para protestar polo bloqueo nas negociacións do convenio colectivo. O paro, que se prolongará durante todo o día, afectará a unhas 600 empresas e a arredor de 4.000 empregados/as.  

Tan só unha semana despois de ter sido aprobado polo Goberno español, o decreto lei de reforma do mercado laboral xa está a incidir de maneira negativa na negociación colectiva. Amparándose na “importantísima incerteza” que están a ocasionar os cambios no marco normativo e aducindo que o importante é o “mantemento do emprego”, a patronal da seguridade privada considera “inviábel” a proposta económica que presentara o 12 de abril, que consistía na conxelación salarial en 2009 e 2010. Os sindicatos rexeitan esta medida.