Representantes da CIG compareceron en rolda de prensa para avaliar o papel do alcalde do concello de Santiago, Xosé Sánchez Bugallo, no conflito de Urbaser. Anxo Noceda, secretario comarcal da CIG de Compostela, acusouno de provocar que os conflitos se alonguen no tempo máis que en ningún outro lugar do país derivando, nos máis dos casos, en longas folgas nas que se coloca de parte da patronal.  Paulo Rubido, secretario nacional da CIG-Servizos, asegurou ademais, que dados os insultos e acusacións de “semiterroristas” feitas contra os traballadores pola concelleira de Servizos, Marta Álvarez Santullano, estase estudando emprender accións legais.

A CIG-Servizos vén de denunciar publicamente a precaria situación laboral dos traballadores e traballadoras que realizan as tarefas de control, portería e limpeza da Torre de Hércules, por mor das terríbeis condicións nas que o Consorcio de Turismo, o Concello de A Coruña e a Autoridade Portuaria manteñen o edificio Patrimonio da Humanidade.

A CIG-Servizos de Ferrol amosa a súa satisfacción polos resultados obtidos nas eleccións sindicais celebradas o pasado xoves 27 de maio en “DIA Supermercado”, nas que houbo unha elevada participación. As eleccións eran a nivel provincial e escollíase un comité de 13 representantes. O anterior estaba conformado na súa totalidade polo sindicato FETICO. Porén, tras deste proceso FETICO fica con 6 delegos/as, a CIG obtén 3 representantes, 2 CCOO e 3 a UGT.

A Federación de Servizos da CIG de Ferrol vén advertir ao Concello que tomará todas as medidas oportunas na defensa das traballadoras e traballadoras da asociación DYA e a empresa Serviasistencia, ás que o goberno municipal excluíu do concurso para a prestación de servizo a domicilio, e coas que mantén importantes débedas económicas. A CIG-Servizos denunciou a situación de indefensión na que teñen quedado os empregados/as destas firmas, ao non garantírselle a subrogación, e os trastornos que se están a causar aos usuarios/as deste servizo.

CIG-Servizos rexeitou asinar o Convenio de Comercio de Materiais de Construción da provincia de Pontevedra despois de que a asociación de empresarios do sector e as centrais CCOO e UGT se negasen a firmar o documento en galego aducindo que se trataba dun “capricho” dos representantes do sindicato nacionalista.

Delegados e delegadas da CIG participaron esta mañá nunha concentración diante dos xulgados de A Coruña para denunciar a situación de persecución e acoso laboral que está a padecer un traballador da empresa Envoltorios Stock, dedicada ao comercio do papel e Artes Gráficas. A protesta coincide coa celebración do xuízo polas vacacións do traballador, que a empresa, situada no Polígono Espírito Santo en Cambre, impuxo de xeito unilateral e incumprindo a lexislación.