A CIG-Servizos denunciou a situación na que se atopan os traballadores e as traballadoras de PQM, concesionaria dos servizos de hostalería do Arsenal Militar de Ferrol, aos que a empresa lles debe os salarios de marzo e abril. A situación vén repetir a imaxe dos últimos anos cando a anterior concesionaria, Los Lebreros, procedía sistematicamente ao impagamentos das nóminas.

A CIG-Servizos de Ferrol vén de denunciar publicamente as irregularidades cometidas pola empresa Urbaser, concesionaria do servizo de limpeza viaria do Concello, ao infrinxir a Lei de Prevención de Riscos Laborais e pondo en serio risco de accidente aos traballadores/as. Dende a Federación criticaron tamén a actitude da Inspección e do Concello de Ferrol por non actuar con dilixencia e de xeito contundente contra as irregularidades cometidas pola empresa.

Os traballadores e as traballadoras de Urbaser, concesionaria da recollida do lixo e da limpeza viaria en Santiago de Compostela, decidiron desconvocar a folga que mantiñan dende o 9 de maio despois de que a empresa aceptase readmitir os tres compañeiros despedidos. A patronal tamén se compromete a reorganizar os horarios, incrementar as xornadas de descanso e estudar outras melloras sociais.  

O 13 de maio tiña lugar diante do Concello de Cangas unha concentración en resposta á represión sindical na empresa concesionaria do parque de bombeiros do Morrazo, "Celtaprix", que sanciona de forma reiterada a delegados da CIG desde o 2009. A mobilización tiña como obxectivo conseguir que o presidente do Consorcio Comarcal do que depende o parque, José Enrique Sotelo (PP) poña fin a esta situación. Para Suso García, secretario da Unión Comarcal da CIG no Morrazo, "a empresa pretende librarse dos traballadores máis reivindicativos de cara a xestionar o futuro Consorcio Provincial".

Traballadoras do CPI de Panxón e delegados/as da CIG pecháronse o xoves na delegación da Consellaría de Educación en Pontevedra para reclamar a continuidade das seis compañeiras despedidas, logo de que a Xunta decidise anular o servizo de limpeza contratado á empresa da que dependían estas empregadas, catro das cales xa levaban traballando no centro 23 anos.

Delegados e delegadas da CIG concentráronse esta mañá diante da sede de Vegalsa-Eroski no Polígono de Agrela para denunciar a política de represión sindical que a empresa está a pór en práctica. Dende a CIG-Servizos criticaron que Vegalsa vén de sancionar a unha delegada da central, baixo falsas acusacións, con 16 días de emprego e soldo, dentro dunha manobra para evitar que os traballadores e traballadoras sexan conscientes de que son os peores pagados/as do sector.