O próximo venres día 7 de maio, ás 12:00 horas concentraranse, na rúa Príncipe de Vigo, delegados e delegadas do sector de comercio téxtil en demanda da negociación do convenio colectivo da provincia de Pontevedra, paralizado desde decembro de 2008.  Esta é a segunda mobilización convocada logo de que o pasado venres día 30 de abril se manifestaran polas rúas do centro de Vigo.

A CIG convocaba, o pasado xoves 29 de abril, unha concentración diante das portas da empresa XADE, que xestiona o Multiusos de Sar e o complexo deportivo de Santa Isabel, en demanda da readmisión do socorrista despedido un mes despois de rematar o conflito laboral que provocou a convocatoria dunha folga de 47 días de duración, nas instalacións deportivas de Galiza.

O pasado martes, día 27 de abril, representantes da CIG e da UGT concentrábanse diante do Rectorado da Universidade de Santiago para exixir a readmisión dunha traballadora da Fundación USC Deportiva, despedida o último día de presentación de candidaturas ás eleccións sindicais e que formaba parte dunha delas.

A CIG-Servizos vén de desmentir as afirmacións emitidas pola Asociación Nacional de Grandes Empresa de Distribución (Anged), nas que asegura que a decisión da Xunta de non permitir a apertura dos comercios máis domingos e festivos suporá deixar de crear 500 empregos. A Federación lembra que o propio convenio de grandes almacéns permite mudar os horarios dos traballadores/as para adaptalos ás aperturas en domingo, polo que resulta bastante incríbel que un xigante da distribución fose incrementar o seu cadro de persoal por dous días de traballo a maiores. As grandes superficies pretenden utilizar o argumento do emprego para acometer un novo atropelo contra os dereitos da clase traballadora e conseguir a liberalización total dos horarios comerciais.

Traballadoras/es do servizo de limpeza do CPI de Panxón e representantes da CIG pecháronse na mañá deste venres 23 de abril na consellaría de Educación, no edificio administrativo da Xunta de Galiza, para denunciar a situación de indefensión na que se atopan e demandar da administración unha solución a este conflito.

Este xoves día 22 de abril celebrouse o Consello da xunta no que estaba previsto que o goberno anunciara que ía aprobar a autorización de apertura de catro domingos e festivos máis. Previamente, nunha reunión coa Directora Xeral de Comercio, os sindicatos comunicaron a total oposición a esta medida e anunciaron a súa intención de convocar mobilizacións e folga. Alén diso, a CIG xa tiña preparada a denuncia, logo de realizar un estudo do borrador de decreto que enviara a Xunta, que demostraría a ilegalidade do procedemento seguido para impor estas aperturas.