Manifestación na defensa dos servizos sociais públicos

Segue a loita das Escolas Oficiais de Idiomas contra os recortes e autoritarismo da Consellaría Educación. O pasado día 23 de xaneiro celebrouse unha "peregrinaxe" reivindicativa desde o Monte do Gozo até o Obradoiro para denunciar os recortes nas Escolas Oficiais de Idiomas cos graves prexuizos para os traballadores e usuarios deste servizo público. Anxo Louzao fixo fincapé en que contrasta esta actitude de redución dos servizos de ensino das linguas nun momento en que se utiliza como excusa para a reducción do galego a ensinanza do inglés. A directora da EOI de Santiago tamén denunciou o despotismo e escurantismo da administración ao non escoitar nin contar cos docentes das EOIs a hora de lexislar, concretamente na elaboración do ROC. Insisten en pedir a retirada da circular 5/2009 e volver ao consenso anterior.

A CIG-Ensino valora a participación na folga convocada en demanda da retirada das bases do decreto do plurilingüismo como un éxito rotundo, xa que en todos os centros as aulas estaban maioritariamente baleiras de alumnado. Desde a CIG-Ensino emprazamos ao Presidente Feijoo e ao conselleiro de Educación a tomar boa nota e recoñecer que o ensino galego rexeita esta proposta de bases, por ser un ataque sen precedentes ao noso idioma.

O día 19 o Secretario Nacional da CIG-Ensino, Anxo Louzao, e Marta Dacosta, responsábel de Normalización na CIG-Ensino, acudiron á entrevista convocada polo Conselleiro de Educación; unha convocatoria feita a mantenta para restar proxección nos medios ás declaracións da organización sindical. A CIG considera absolutamente inaceptábel que, a horas da realización da folga do 21 de xaneiro, a organización sindical maioritaria no ensino e convocante da folga sexa recibida en último lugar, o que vén ser unha nova burla ao profesorado. Por outro lado, a CIG comprobou que esta entrevista só pretendía ser unha xustificación diante da sociedade, pois a Consellaría pretende continuar coa súa cruzada contra o galego.

A CIG agarda que a consellaría de Traballo amose “sensibilidade democrática” e atenda ás máis de 24.000 persoas que apoiaron coa súa sinatura as demandas das traballadoras/es do Consorcio. Así o manifestaba tras da súa entrega no Rexistro Xeral da Xunta de Galiza, Anxo Louzao, secretario nacional de CIG-Ensino, quen facía ademais un chamamento á conselleira de Traballo, para que mude a súa actitude advertindo que se na mesa de negociación prevista para o día 13 de xaneiro non se dá resposta ás demandas deste colectivo continuarán as mobilizacións, nomeadamente a folga convocada para o día 19 de xaneiro e a manifestación prevista para o día 30 dese mesmo mes, en defensa dos servizos públicos e contra a súa privatización.