Vídeos | Confederación Intersindical Galega

A CIG-Ensino valora a participación na folga fronte ao decreto contra o galego como un éxito

22/1/2010

A CIG-Ensino valora a participación na folga convocada en demanda da retirada das bases do decreto do plurilingüismo como un éxito rotundo, xa que en todos os centros as aulas estaban maioritariamente baleiras de alumnado. Desde a CIG-Ensino emprazamos ao Presidente Feijoo e ao conselleiro de Educación a tomar boa nota e recoñecer que o ensino galego rexeita esta proposta de bases, por ser un ataque sen precedentes ao noso idioma.

Anxo Louzao fai unha valoración da entrevista co Conselleiro de Educación polo Decreto contra o Galego

20/1/2010

O día 19 o Secretario Nacional da CIG-Ensino, Anxo Louzao, e Marta Dacosta, responsábel de Normalización na CIG-Ensino, acudiron á entrevista convocada polo Conselleiro de Educación; unha convocatoria feita a mantenta para restar proxección nos medios ás declaracións da organización sindical. A CIG considera absolutamente inaceptábel que, a horas da realización da folga do 21 de xaneiro, a organización sindical maioritaria no ensino e convocante da folga sexa recibida en último lugar, o que vén ser unha nova burla ao profesorado. Por outro lado, a CIG comprobou que esta entrevista só pretendía ser unha xustificación diante da sociedade, pois a Consellaría pretende continuar coa súa cruzada contra o galego.

Traballadoras e traballadores do Consorcio levan a cabo a terceira folga

20/1/2010

Traballadoras e traballadores do Consorcio Galego de Servizos de Igualdade e Benestar secundaron masivamente a folga convocada pola CIG e sumáronse á manifestación que percorreu as rúas de Compostela para rematar concentrándose diante das dependencias da Xunta de Galiza en San Caetano. Durante o percorrido da marcha corearon consignas contra a privatización e desmantelamento destes servizos públicos, contra os despedimentos das 61 compañeiras e compañeiros e en demanda da aplicación do convenio colectivo.

Entréganse no rexistro da Xunta máis de 24.000 sinaturas en apoio das demandas de traballadores/as e usuarios/as

22/12/2009

A CIG agarda que a consellaría de Traballo amose “sensibilidade democrática” e atenda ás máis de 24.000 persoas que apoiaron coa súa sinatura as demandas das traballadoras/es do Consorcio. Así o manifestaba tras da súa entrega no Rexistro Xeral da Xunta de Galiza, Anxo Louzao, secretario nacional de CIG-Ensino, quen facía ademais un chamamento á conselleira de Traballo, para que mude a súa actitude advertindo que se na mesa de negociación prevista para o día 13 de xaneiro non se dá resposta ás demandas deste colectivo continuarán as mobilizacións, nomeadamente a folga convocada para o día 19 de xaneiro e a manifestación prevista para o día 30 dese mesmo mes, en defensa dos servizos públicos e contra a súa privatización.

As federacións da Área Pública da CIG concéntranse diante do Parlamento en demanda do cumprimento dos acordos

17/12/2009

Coincidindo coa celebración do pleno no que, cos votos do Partido Popular, se aprobaban os orzamentos para o ano 2010, delegados e delegadas das federacións da área pública da CIG: Administración, Ensino e Saúde, concentrábanse diante do Parlamento de Galiza para exixir o cumprimento dos acordos retributivos asinados pola propia administración, que agora se nega a cumprilos.

Os orzamentos de Galiza para o ano 2010 contemplan un cativo aumento salarial do 0,3% para as e os empregados públicos. Un incremento que, na práctica, supón unha nova conxelación dos seus salarios e que vén engrosar a importante perda de poder adquisitivo acumulada nos últimos anos, que supera o 42%.

Diante desta situación, as federacións da área pública da CIG levan meses mobilizándose para exixir do goberno de Núñez Feijoo que nos orzamentos da Xunta de Galiza para o ano 2010 se contemplen as partidas necesarias para asumir e cumprir os acordos retributivos que estaban asinados e que o goberno decidiu conxelar sine die. Demandas que non foron contempladas ao aprobarse os orzamentos definitivamente sen incluír ningunha das súas demandas.

Masiva participación na folga convocada en todos os centros de traballo, secundada polo 90% dos traballadores/as

17/12/2009

A CIG valora moi positivamente a participación das traballadoras e traballadores do Consorcio Galego de Servizos de Igualdade e Benestar na folga e na manifestación convocadas no día de hoxe. Mobilizacións coas que se reclama a aplicación do convenio, partidas orzamentarias para manter os servizos e os postos de traballo e o cumprimento das condicións laborais pactadas, nomeadamente no referido a xornada e a suba salarial, a celebración das oposicións aprobadas, a resolución das irregularidades que se están a producir e que se garanta o seu carácter público.