CIG-Correos denuncia o mal funcionamento do servizo en Teo por falta de persoal de reparto

En xaneiro de 2005, Correos entregou, aos traballadores de Correos de Teo, unha proposta de reforma baseada nun estudo feito no ano 2004, que estabelecía a necesidade de aumentar o cadro de persoal de Correos en Teo en 3,5 persoas máis. Malia o tempo transcorrido ese incremento non se efectivizou. O sector de Correos da CIG denuncia esta situación e o mal funcionamento do servizo na actualidade.

Manuel Anxo Álvarez Amado, secretario de Organización de CIG-Correos, sinala ademais que, nos últimos tres anos, a situación ten empeorado pola crecemento urbanístico do Concello de Teo e o consecuente medre de habitantes. “Correos nunca tivo a ben aumentar o cadro de persoal de repartidores no número preciso para garantir un servizo público e de calidade e ofrecer un reparto de correspondencia todos os días laborábeis en todos os domicilios, como así o indica a Lei Postal no seu artigo 17.2”, explica.

Álvarez Amado engade que os reforzos que ocasionalmente pon a entidade no Concello de Teo “son insignificantes e non solucionan para nada a continua acumulación de obxectos postais día tras día”.

Por iso, desde a CIG-Correos anuncian a recollida de sinaturas por todo o Concello de Teo para dirixilas ao presidente de Correos e a convocatoria dunha concentración diante da oficina de A Ramallosa (Teo), o próximo sábado día 19 de xaneiro, en demanda de aumento de persoal e dunha mellor calidade do servizo de reparto.