Despiden a doce traballadoras/es da limpeza do Alcampo e incumpren o convenio provincial ao non subrogar ao persoal

A finais do mes de xaneiro estas 12 traballadoras e traballadores da limpeza recebian un aviso verbal de que ían ser despedidas, xa que a empresa Tecliman para a que traballaban deixaba de ser a empresa adxudicataria do servizo de limpeza do Alcampo, e a nova empresa, Amil Lago Servizos Xerais, só conta con persoal con discapacidades, polo que non procedía á subrogación do persoal como está fixado no Convenio Provincial. As traballadoras e traballadores decidiron mobilizarse e comezar unha loita a todos os niveis na defensa dos seus postos de traballo

As doce despedidas e despedidos contan cunha media de 15 anos como traballadoras/es da limpeza neste centro de traballo, habendo casos de persoas que levan até 26 anos traballando neste espazo.

Desaloxo á forza

O domingo á noite, cando entraba a primeira quenda de traballo da nova empresa, as traballadoras/es despedidas ocuparon a entrada do Alcampo e fixeron unha sentada, polo que desde a dirección do Alcampo chamaron á policia, que desaloxou á forza a estas compañeiras/os.

Tomas Gonzalo, da CIG-Servizos, cualificou esta actuación policial de "desproporcionada", nun desaloxo no que "collían en peso á xente e no que utilizaron a forza" e criticou duramente estes despedimentos, xa que "abren á veda a que outras empresas queran facer o mesmo tipo de xogada para abaratar custes e gañar concursos de adxudicación, e neste caso hai que lembrar que é moi grave porque se está a incumprir o que marca o convenio, que hai que subrogar ao persoal".

Concentracións

Desde o domingo e ao longo de toda a xornada do 1 de febreiro, as traballadoras/es despedidos e representantes das centrais sindicais CIG, CCOO e UGT permaneceron concentrados ás portas do Alcampo de Coia.

A CIG realizará as xestións necesarias para que se reúna a Comisión Paritaria do Convenio Provincial, pola vulneración do mesmo e o seu incumprimento neste grave caso.