Portada
Temas
Confederal
Sectores
Entrevistas
Opinion
Multimedia
Contacta
 
Vigo, 1/6/2012
Chuza Menéame del.icio.us
compartir

Os carteiros/as do centro de Vigo convocan unha folga indefinida de media xornada contra a eliminación de 13 postos de traballo

Dende a CIG alertan que detrás dos recortes no servizo agóchase a intención de privatizar a empresa estatal Correos
Os carteiros/as da Unidade de Reparto 1 de Vigo, correspondente á zona centro da cidade, convocan unha folga indefinida de media xornada a partir deste luns día 4 en protesta pola eliminación de 13 postos de traballo. Dende a CIG denuncian que se trata unha medida encamiñada a afondar no deterioro do servizo con vistas á futura privatización de Correos.

Antonio García, en primeiro termo, é o responsábel comarcal da CIG-Correos en Vigo.

Así o anunciaron hoxe en rolda de prensa representantes da CIG, CCOO e UGT, que explicaron que tamén se suman á convocatoria as centrais CGT e Sindicato Libre. O paro dará comezo a partir das 7.30 horas do luns. Os representantes sindicais explicaron que a dirección comunicoulles que nun principio os trasladan de lugar, “pero cando sigan cos recortes noutras zonas rematarán por eliminar eses postos de traballo”.

Neste senso, lembran que a compañía sempre sostivo que non despediría traballadores/as “senón que reduciría postos innecesarios e incentivaría baixas voluntarias”.

Dende a CIG explicaron que detrás desta decisión -que cualifican de desproporcionada tendo en conta que a redución prevista no conxunto do Estado español era do 5% do persoal e esta medida supón unha redución do 25% do cadro de persoal- agóchase a intención de afondar no deterioro do servizo con vistas a unha futura privatización de Correos. “Ademais, con esta medida incumpren a Lei Postal, que establece o reparto diario de uns a venres, xa que con este volume de emprego só se poderá garantir o reparto diario dous ou tres días á semana”.

Finalmente, adiantan a convocatoria dunha manifestación para a vindeira semana coa que pretenden amosar publicamente a súa oposición aos plans da compañía. Ao mesmo tempo, continúan coas concentracións diarias ás portas da oficina de reparto do centro.

cig.prensa@galizacig.com