O Consello Escolar do Estado aproba a proposta da CIG-Ensino para que relixión non forme parte do currículo escolar

A CIG-Ensino fai unha valoración positiva deste resultado porque o máximo organismo de participación educativa do Estado, no cal están representados o propio Ministerio de Educación, os/as presidentes/as dos consellos escolares de toda as comunidades autónomas, os/as representantes das universidades, as organizacións sindicais, as confederacións de ANPAS e organizacións estudantís, vén de apostar polo ensino laico e deixa, tamén, en evidencia, como quedou patente no conflito sobre o Decreto de Bacharelato, o prexuízo que causa esta materia confesional por reducir o horario de materias fundamentais como ocorreu coa Filosofía e Historia no caso galego.

Esta proposta defendida no Consello Escolar do Estado polo Secretario Nacional da CIG-Ensino, Anxo Louzao, é semellante á que o Consello Escolar de Galiza, na reunión do 28 de abril, co motivo do debate do Decreto de Bacharelato, se negou, non só a tela en consideración, senón mesmo a que se puidera votar a emenda transaccionada de CIG que dicía: “O Consello Escolar de Galiza recomenda ás autoridades educativas que no futuro o ensino das confesións relixiosas non teña presenza nas ensinanzas escolares”. A CIG-Ensino non sabe que opinarán todos os que se opuxeron ese día a votala (UGT, representantes de Consellaría, alcaldes do PSOE, CONFAPA, etc. ) ou se abstiveron como CCOO.