Portada
Temas
Confederal
Sectores
Entrevistas
Opinion
Multimedia
Contacta
 
Compostela, 1/7/2009
Chuza Menéame del.icio.us
compartir

Pizarras Caborco Oscuro obriga aos traballadores/as a facer o recoñecemento médico fóra da xornada laboral

A CIG-Valdeorras denuncia que a empresa incumpre o convenio colectivo da lousa
A CIG de Valdeorras vén de denunciar que Pizarras Caborco Oscuro S.A. está a ameazar ás traballadoras e traballadores que se negan a facer os recoñecementos médicos fóra do seu horario de traballo, obrigándoos a renunciar voluntariamente a este dereito ou lanzando advertencias a respecto das futuras renovacións nos contratos.

Segundo indicaron dende a CIG de Valdeorras, Pizarras Caborco Oscuro obriga aos traballadores/as que se negan a facer o recoñecemento fóra do horario laboral a asinar un escrito polo que o operario/a renuncia voluntariamente ao recoñecemento. Mentres, cos/ás traballadores/as que rexeitan asinar dito escrito e exixen facer a consulta dentro do horario de traballo, tal e como estipula a lexislación laboral vixente, as ameazas “soben de ton”, deixando caer “sibilinamente” a posibilidade de padecer problemas á hora da renovación dos contratos, e recorrendo a escusa de que “hai bastante xente no paro”.

“Isto é intolerábel e un grave incumprimento do convenio colectivo da Lousa”, afirma o responsábel da Unión Local da CIG de Valdeorras, Adriano Brito, quen lembrou que o dereito ao recoñecemento médico é “unha conquista histórica, porque todos e todas temos dereito a que se protexa a nosa saúde”.

“En tempos de crise os patróns da lousa apretan máis aos traballadores/as, xa non lles chega con espremelos durante todos estes anos, agora até lle queren sacar a polpa”, lamenta Brito.

Dende a CIG-Valdeorras tamén animaron ao conxunto do persoal do sector a denunciar este tipo de atropelos, “que non se deixen chantaxear” e que exixan o cumprimento dos seus dereitos.

cig.prensa@galizacig.com