Bombeiros do Morrazo péchanse durante seis horas na Deputación para reclamar a fin das represalias en Celta Prix

Bombeiros do Parque Comarcal do Morrazo continúan coas protestas para rexeitar a actitude despótica da concesionaria, Celta Prix, que despediu un traballador e sancionou dous máis. Os profesionais de Emerxencias permaneceron durante seis horas pechados na Deputación de Pontevedra o 9 de novembro como medida de presión para que a institución provincial medie no conflito.

Os bombeiros concentráronse nas dependencias da Deputación o 9 de novembro reivindicando a readmisión do compañeiro que foi despedido e a nulidade das sancións impostas aos outros dous traballadores, un deles delegado de persoal. Finalmente foron desaloxados do edificio da Deputación pola policía española.

Pola súa banda, José Enrique Sotelo, presidente do Consorcio Provincial e deputado provincial do PP, negouse a falar cos bombeiros, limitándose a asegurar que este é “un problema laboral entre a empresa e os traballadores”. Os bombeiros recórdanlle a Sotelo que lea os estatutos do Consorcio, que exerza de presidente do mesmo e que non omita as responsabilidades do seu cargo.

Agardando pola xuntanza con Celta Prix

Os traballadores aínda continúan agardando manter unha reunión coa dirección de Celta Prix; xuntanza que a empresa se comprometera a convocar logo da mobilización do 22 de outubro diante da Deputación Provincial.

Mentres os bombeiros piden unha saída negociada a este conflito, a empresa expedientou o delegado de persoal cunha falta moi grave e perda de confianza que ocasiona unha sanción de suspensión de emprego e soldo durante 11 días. Tamén sufriu o mesmo castigo o irmán do traballador despedido.