Os altos cargos da Axencia Tributaria en Galiza repártense 1.287.000 euros no plus de produtividade

A Sección Sindical da CIG na Axencia Tributaria rexeitou a distribución do complemento de produtividade na AEAT, xa que se basea en criterios arbitrarios e inxustos que favorecen aos altos cargos. Por iso, demandan un cambio no criterio de reparto que permita que as cantidades deste complemento variábel se inclúan nas retribucións fixas. Ademais, sinalan os delegados/as da CIG, coas cantidades destes pluses poderíanse contratar máis traballadores/as para reforzar un servizo tan escaso de persoal como o da Vixilancia Aduaneira.

A continuación reproducimos o comunicado emitido pola Sección Sindical:

Dende a Sección Sindical da CIG na AEAT queremos manifestar a nosa máis absoluta indignación e disconformidade coa distribución do complemento de produtividade na AEAT en xeral e, en concreto, na  Delegación Especial de Galiza. O sistema de reparto da produtividade na Axencia Tributaria sempre foi  arbitrario, caprichoso e inxusto, e polo tanto dende a CIG sempre avogamos por erradicar este sistema de incentivos,  tan dado a prácticas de amiguismo e caciquismo nas Admón. Públicas, e incluír as cantidades económicas derivadas deste complemento variable nos complementos retributivos fixos, léase soldo, complemento de destino ou complemento específico; ou, como mal menor, acordar entre a parte social e a admón. uns criterios obxectivos que fixeran da produtividade o incentivo que recompensa o grao de interese, iniciativa, esforzo, especial rendemento e dedicación extraordinaria dos traballadores no desempeño da súa labor.

Se a CIG sempre se mostrou contraria a este reparto inxusto, é agora nestes tempos de crise cando as cantidades repartidas pola AEAT na Galiza adquiren en toda a súa extensión o calificativo de escandalosas. Se observamos as cantidades cobradas en concepto de produtividade pola elite da AEAT na nosa Delegación Especial, podemos chegar á conclusión do reparto vergoñento duns cartos que proceden dos impostos que pagan os cidadáns.

En efecto, dun presuposto en produtividade, para toda a AEAT, de 79 millóns de euros, unha gran parte van parar ás mans dos altos cargos e dos funcionarios do grupo A1. Na Galiza o funcionario que máis cobrou recibiu nada mais e nada menos que 30.799 euros no ano 2011 só por este concepto que supera, en moito, ás retribucións totais que cobran o resto do persoal dos grupos C1 e C2. Noutros moitos casos a produtividade anual desta “elite” ascende a  20, 18 e 12 mil euros cantidades que nós xulgamos exorbitantes e que poderían utilizarse para a contratación de novo persoal nestes tempos que estamos a ver como se desmantelan as pequenas Administracións da AEAT e no que as embarcacións de Vixilancia Aduaneira andan escasísimas de persoal.

Se sumamos que, ademais Galiza é un país no que abunda a economía somerxida, o fraude fiscal e o diñeiro negro procedente de actividades ilícitas como a trata de brancas e o narcotráfego o pago destes “pluses” resultan aínda máis vergonzosos. O resto dos traballadores, os dos grupos máis baixos, nos que realmente recae a carga de traballo, cobran cantidades irrisorias que nalgúns casos non superan os 50 euros mensuais.

Por todas estas cuestións a CIG, nunha xuntanza coa nova Directora da AEAT, demandou que se poña fin, dunha vez, a estas prácticas feudalistas de reparto da produtividade e se aborde, dunha vez por todas, a negociación necesaria para impedir que estas inxustizas  se repitan no futuro.