Arredor de 1.500 escolares participan no Correlingua en Vigo baixo o lema “Galego, todo o que buscas”

Vigo foi escenario hoxe dunha nova edición do Correlingua, actividade lúdico-educativa de reinvindicación da lingua galega organizada pola Asociación Socio-Pedagóxica Galega, a CIG–Ensino e a Mesa pola Normalización Lingüística xunto cos Concellos de Lugo, Ourense, Pontevedra e Vigo. Arredor de 1.500 rapaces e rapazas percorreron as rúas da cidade antes de rematar no parque de Castrelos, onde tiveron lugar as actuacións musicais e as actividades lúdicas para os máis pequenos.

A organización agradeceu a participación do alumnado e dos centros que quixeron percorrer as rúas de Vigo no día de hoxe para reclamar a normalización do galego.

Na festa final da carreira pola lingua, que se celebrou no parque de Castrelos e foi presentada pola actriz Iria Sobrado, deuse lectura ao manifesto e celebráronse actividades lúdicas para os máis pequenos. A continuación actoaron o grupo Zurrumalla e o gañador do concurso musical Cantalingua 2012, Xenderal.