CIG-Correos mobilízase para alertar das consecuencias que tería a privatización da compañía

Delegados e delegadas de CIG-Correos concentrábanse este xoves ante a sede da compañía, na zona vella compostelá, para alertar tanto ao persoal como á cidadanía das consecuencias que tería a súa privatización. Serxio Martínez, responsábel nacional do sector, considera que esta posibilidade está cada vez máis cerca, logo de que o Partido Popular o pasara á SEPI, como se fixo con outras empresas públicas que logo acabaron finalmente en mans privadas.

Martínez explica que Correos foi pasando, tanto cos gobernos do PSOE como cos do PP de ser unha dirección xeral a  unha sociedade pública empresarial, logo a organismo autónomo, despois a sociedade anónima e finalmente á SEPI.

CIG-Correos, que inicia con esta mobilización unha campaña de sensibilización social, advirte das consecuencias que a privatización tería, fundamentalmente, para o rural galego. “Sería o máis prexudicado do estado, porque Galiza ten máis do 50% dos núcleos de poboación e un hábitat disperso, que dificulta e encarece o reparto, restando rendibilidade”.

De feito, Correos ten un contrato co estado para que se lle compense economicamente a carga adicional que supón a prestación de servizo no rural. Deste xeito, é o estado quen garante o cumprimento da Lei Postal, que di que todos os cidadáns teñen dereito a recibir o correo no seu domicilio todos os días laborábeis da semana. Segundo Martínez, aínda que a Lei non se está cumprindo en toda a súa extensión estaría moito máis en risco caso de privatizaren o servizo.

Para CIG-Correos tamén están en risco as condicións laborais do persoal. Dunha parte, denuncia a discriminación existente nas condicións de traballo dos diferentes colectivos -funcionarios e laborais-, desde días de permiso, até vacacións.

Xunto a isto denuncian a situación na que se atopan os carteiros rurais, porque parte do servizo o subvencionan os carteiros do seu peto. “Nunca se lles sube o carburante, a última suba foi dun 0,05% por quilómetro, mentres que a gasolina incrementou o seu prezo espectacularmente. Ademais teñen que pór o seu coche particular e malia adicalo durante sete horas e media a correos -a maioría da vida útil do vehículo-, non teñen ningún tipo de beneficio fiscal, nin na compra nin no pagamento de impostos”, explica o responsábel nacional do sector.

Alén diso, alertan do risco de que se precaricen as condicións laborais. Serxio Martínez lembra que o propio presidente, na comisión de orzamentos, afirmou que se ían reducir o persoal en 2.000 empregados e que, ao tempo, se ía proceder á consolidación de emprego. “Isto, que pode parecer contraditorio, ten todo o sentido, porque botan a 2.000 e collen a outros, con traballos a tempo parcial ou fixos descontinuos, e poden contratar a máis traballadores pero máis precarios. Esa situación sería aínda máis traumática, se se privatizara”.