imprimir
Os traballadores do sector de mármores e pedras trasladarán as súas protestas das zonas industriais ás cidades e vilas
O traslado das protestas até vilas e cidades da provincia de Pontevedra iniciarase cunha manifestación o vindeiro martes 14 de xullo polas rúas de O Porriño, coincidindo coa nova xornada de folga convocada no sector. A marcha comezará ás 11 horas dende a Casa Sindical na rúa Antonio Palacios facendo un recorrido polo concello, no que están situadas as principais empresas do sector.
A decisión é froito da ausencia de avances no conflito, a pesar da mediación que está a realizar a Inspección de Traballo, e tras as declaracións do presidente da Asociación de Graniteiros de Galicia, organización que representa ás industrias máis importantes de mármores e pedras.
“A patronal deixou clara a súa postura de non querer asumir unha realidade evidente, o que está a deteriorar aínda máis as relacións laborais no sector, o que, á marxe dos efectos da propia folga, vai traer malas consecuencias para o futuro”, afirma o responsábel da CIG-Construción e Madeira de Vigo, Alberto Fernández.
Neste senso, Fernández asegurou que as declaracións do presidente da AGG, ratificando o rexeitamento ao estudo sobre po e ruído e aludindo á existencia de “intereses políticos” detrás da convocatoria de folga, denota unha “clamorosa falta de argumentos, a existencia dun guión preestablecido por parte das organizacións empresariais, empeñadas en descualificar toda reivindicación da clase traballadora”.
Os traballadores e traballadoras do sector manterán novas xornadas de folga os días 14, 16, 21 e 22 de xullo.
