imprimir
Preséntanse en Vigo as “Xornadas internacionais de economia social (vivenda e crédito)” que se celebrarán o 21 e 22 de novembro
Manuel Mera, secretario confederal da CIG de Formación e Comunicación, e Miguel Quinteiro, vicepresidente da Federación de Cooperativas Sinerxia, presentaron o contido destas xornadas, nunha rolda de prensa que tivo lugar no local sindical da CIG de Vigo.
Manuel Mera destacou que "non é casual que nos organicemos estes encontros porque nos parece que o cooperativismo é unha opción importante, que debe ser promovida polo propio sindicato, como unha alternativa necesaria, porque debemos favorecer opcións públicas".
21 de novembro: xornada de encontro
A primeira destas dúas xornadas de encontro terá lugar o día 21 e é "a máis importante, porque é unha xornada de exposición de experiencias, xa que o día 22 quedou configurada como unha xornada máis de traballo, para que a xente máis experta no tema, poda entrar máis a fondo na temática que expoñemos", explicou Mera.
O secretario confederal da CIG de Formación fixo un chamamento á participación nestas xornadas, salientou a gratuidade das mesmas, xa que se conta coa colaboración da Consellaria de Vivenda e Solo de Xunta de Galiza.
Experiencias galegas e internacionais
Nestas xornadas exporanse experiencias sobre cooperativismo de Galiza, mais tamén haberá relatores e relatoras que acheguen experiencias de Uruguai, Portugal, Cataluña, Euskadi, Italia, que deixará "unha boa contribución para que a xente que se achegue coñeza este tipo de experiencias, porque son experiencias moi interesantes das que podemos aprender moito".
Mera subliñou que "é a primeira oportunidade para escoitar de primeira man estas realidades cooperativas", polo que reiterou o convite "a todas aquelas persoas do movemento cooperativo ou interesados no tema, desde os concellos, asociacións veciñais ou organizacións sociais, a que se anoten para participar neste encontro".
Nas xornadas participará unha representante da Consellaria de Vivenda e Solo para dar a coñecer que é o que se está a facer desde a Administración galega neste sentido.
Serán inauguradas polo secretario xeral da CIG, Suso Seixo, Ana Lourenzo, presidenta de Sinerxia, e pola Conselleira de Vivenda, Teresa Táboas, o venres 21 de novembro ás 9.30 da mañá.
Creación dunha banca ética
Miguel Quinteiro, vicepresidente de Sinerxia, explicou que "a burbulla inmobiliaria aparece porque se da nunha economia especulativa e non social, e no crédito acontece isto mesmo, porque no século XIX decidiron crear as caixas de aforro para combater a usura e fomentar a economia familiar e local, e na actualidade estamos vendo o papel que está a xogar a banca privada".
Quinteiro informou de que en Sinerxia teñen na actualidade unha comisión "que está a traballar na creación dunha banca ética, e estamos estudando distintas alternativas, como Cop57, que xa se implantou en distintas autonomias do Estado, ou outras experiencias como a banca ética italiana". Asi, Quinteiro adiantou que "isto o que nos leva é a comprobar que hai alternativas para dar unha perspectiva distinta á cuestión do sistema financeiro"
Quinteiro manifestou que "as cooperativas debemos pular pola creación dunha conciencia social de participación, que faría que as cousas foran moi distintas, e se existira unha maior conciencia cooperativa non viviriamos unha crise como estamos a vivir".
Ademais, o representante de Sinerxia engadiu que "as cooperativas se caracterizan precisamente porque crean postos de traballo estábeis, xusto ao contrario da política empresarial actual e as súas relacións laborais".
Por último, Quinteiro indicou que "destas xornadas poderemos obter conclusións moi interesantes , para que se cambien as orientacións e os xeitos de actuar da economia, baseada en fins especulativos, e non nos sectores produtivos, que é o que realmente pode facer medrar o benestar da maioría da xente".
Programa das xornadas
A continuación anexamos o programa destas xornadas:
PROGRAMA
VENRES 21 DE NOVEMBRO
Sesión mañá
09:15h Recepción de participantes.
09:30h Acto de apertura das xornadas:
Xesús Seixo, Secretario Xeral da Confederación Intersindical Galega (CIG).
Ana Lorenzo Vila, Federación de Cooperativas SINERXIA.
Teresa Táboas Veleiro, Conselleira de Vivenda e Solo da Xunta de Galicia (ou quen ésta designe para a representar).
10:30h Presentación de experiencias de vivenda:
Carlos Márquez Cabrera. Uruguai.
Foi membro do Grupo Asesor do Ministerio de Vivenda do Goberno da República Oriental do Uruguai. É integrante da Cooperativa de Vivenda UCOVITA e COVIPRO.
Antón Ínsua López. Galiza.
Forma parte do Consello Reitor da Cooperativa Salgueiriños de Vivendas de Compostela. Licenciado en Ciencias Económicas pola USC, é actualmente xerente de Cidadania S. Coop. Galega.
Álvaro Costa. Portugal.
É Presidente da Dirección de IRMANADORA - Cooperativa de vivenda e construción, servizos e solidariedade, CRL., presentará a experiencia do cooperativismo de vivenda en Portugal.
Representante da Consellaría de Vivenda e Solo. Galiza.
Presentará as liñas de actuación e accións emprendidas por parte da Consellaría de Vivenda e Solo da Xunta de Galicia, no relativo ao cooperativismo de vivenda.
14:30h Xantar.
Sesión tarde
16:30h Presentación de experiencias de crédito:
Jose María Larrañaga Bolinaga. Euskadi.
Enxeñeiro técnico. Ex Director de Persoal de Fagor que presentará a experiencia de crédito cooperativo de Mondragón: a Caja Laboral Popular Coop. de Crédito - Euskadiko Kutxa.
Ramón Pascual Sanpons. Cataluña.
É Coordinador de Coop57, unha cooperativa de servizos financeiros que destina os seus recursos propios a dar préstamos a proxectos de economía social.
Peru Sasia Santos. Euskadi/Italia.
É o Director Xeral de FIARE (Fundación de Inversión y Ahorro Responsable), e presentará a experiencia da Banca Popolare Ética (Italia), coa que FIARE ten unha relación estratéxica e da que promove produtos financeiros de apoio á economía social.
19:00h Peche da sesión.
Sábado 22 de novembro
10:30h Mesas de traballo e debate.
14:00h Peche das xornadas.
ANÓTATE
Para participar nas xornadas tan só é preciso que solicites a túa pre-inscrición mediante correo electrónico dirixido ao seguinte enderezo: vivendaecredito@gmail.com
Tamén nos telefones: 986 896 526 (SINERXIA) e 986 827 948 (CIG)
Indica tamén se vas participar a título individual ou en representación dalgunha entidade/organización (sinalando nese caso cal).
A participación nas xornadas será totalmente gratuíta (incluído o xantar do venres 21) e entregarase certificado de asistencia a quen o precise e/ou solicite.
Por mor da limitación do aforo as prazas son limitadas e asignaranse por rigorosa orde de inscrición. As inscricións serán definitivas só unha vez sexan confirmadas pola organización.
