Portada
Temas
Confederal
Sectores
Entrevistas
Opinion
Multimedia
Contacta
 
A Coruña, 11/12/2008
Chuza Menéame del.icio.us
compartir

A Consellaría de Educación suprime a materia de Alemán no IES Salvador de Madariaga da Coruña

Os dous alumnos inscritos terán que se matricular noutra optativa despois de tres meses de clase
A Delegación provincial da Consellaría de Educación suprimiu nesta semana a materia de Alemán que se impartía no IES Salvador de Madariaga. Os dous alumnos inscritos terán que se matricular noutra optativa, transcorridos xa máis de tres meses desde o inicio do curso académico.

Dáse a circunstancia de que o profesor de Alemán ten o destino definitivo no IES Salvador de Madariaga. Ademais, os dous alumnos matriculados xa se teñen examinado da materia agora suprimida pola Consellaría de Educación.

Esta decisión inexplicábel e completamente censurábel de Educación obriga estes alumnos a inscribírense agora noutras materias optativas, no momento en que finaliza o primeiro trimestre do curso académico.

A xuízo da CIG-Ensino, a supresión da materia de Alemán no IES Salvador de Madariaga cuestiona a propaganda de Educación acerca dun suposto fomento da aprendizaxe de linguas estranxeiras entre o alumnado do ensino secundario. A Consellaría predica unha cousa mais logo executa a contraria.

A CIG-Ensino enmarca esta decisión de Educación dentro da campaña emprendida por este gabinete da Xunta para suprimir materias optativas cun número reducido de alumnos matriculados. Esta política é aplicada en moitos centros educativos da nosa comarca. Por exemplo, o departamento dirixido por Laura Sánchez Piñón suprimiu no IES de Viós (Abegondo) Latín, Francés e Bioxeoloxía ou, na Escola de Artes Plásticas Pablo Picasso, o ciclo formativo “Módulo I de Taller Cerámico”.

cig.prensa@galizacig.com