Dous traballadores da asemblea de parados do naval súbense a un guindastre en Barreras pola defensa do emprego no sector

Desde as 4 da mañá do xoves 11 de febreiro dous traballadores da asemblea de parados do naval permanecen nun dos guindastres do estaleiro Barreras. "Esta é unha acción desesperada porque a nosa situación tamén o é, non temos xa con que manter as nosas familias", sinalan desde esta asemblea de desempregados do sector naval. A dirección do estaleiro decidiu cortarlles o suministro eléctrico ao guindastre e non permitiron que se lles sumistrase nin auga nin alimentos. Estes dous traballadores manteñen a súa firme vontade de continuar neste guindastre até que a dirección de Barreras se reúna coa asemblea de parados do naval para escoitar as súas reivindicacións.

Desde a asemblea de parados anuncian que nos próximos dias pode haber máis accións deste tipo noutros estaleiros da ría de Vigo, xa que "está en xogo que podamos continuar a traballar algún día no sector naval, porque mentres non se regule a contratación nos continuaremos no desemprego, e moita máis xente estará na nosa situación".

Demandan solucións

Solicitan que as Administracións e os empresarios solucionen realmente o problema da contratación no sector, e que se busque unha saída a este conflito aberto no naval vigués.

Desde este colectivo tamén adiantaron que os dous traballadores que están no guindastre non baixarán até que a dirección do estaleiro se reúna cunha representación da asemblea de parados.

Grupo de apoio

Desde fora do estaleiro, os compañeiros da asemblea de parados achegaronse para darlles ánimos, e foron identificados por antidisturbios que de seguido chegaron, permanecendo varias dotacións destas forzas policiais na zona nestes momentos.