A CIG denuncia a discriminación da Automoción Galega nas axudas concedidas polo Ministerio de Industria

Ante o reparto das axudas aprobadas polo Ministerio de Industria para o Sector do Automóbil  neste ano 2010 e unha vez coñecido o reparto que se destina na partida a provedores, a CIG entende que se produce unha decisión política clamorosamente  discriminatoria coa Industria da Automoción Galega. 

O feito de deixar sen axudas a dúas das principais Industrias da Comarca como son o Grupo Viza e Copo que comprometen un nivel de emprego superior a 1600 traballadores, deixa en evidencia que o Goberno Español pode ser sensible as demandas das Multinacionais provedoras pero despreza ao mesmo tempo ás Empresas Galegas que so dependen do seu capital. 

A decisión tomada polo Ministerio de Industria deixa ás empresas Galegas nunha situación de desvantaxe a nivel competitivo coas demais Empresas Multinacionais, nunha conxuntura  especialmente difícil para este ano 2010.

Non parece que esta sexa unha decisión inocente senón claramente arbitraria e deliberada, que penaliza ao sector da automoción galego que non ten a flexibilidade financeira de mobilizar recursos doutros lugares para aquí. 

Dende a CIG esiximos  que se revise o criterio de reparto ou se amplie o orzamento para atender a estas empresas ao tempo que solicitamos da Xunta que actue na súa responsabilidade política diante do Ministerio de Industria para defender o País e as súas Industrias.