Os traballadores de instalacións deportivas acordan continuar coa folga mentres as súas demandas non estean garantidas

Os traballadores e traballadoras de instalacións deportivas, en folga desde hai case dúas semanas, acordaron na asemblea celebrada este venres en Compostela, non aceptar a condición de suspensión da folga, tal e como pide a patronal para retomar as negociacións- mentres non teñan garantías claras de que as súas demandas serán recollidas no convenio. Pola súa banda a conselleira de Traballo, Beatriz Mato, comprometeuse publicamente a mediar coa patronal para darlle unha saída ao conflito.

Tras da asemblea, os traballadores e traballadoras realizaron unha concentración diante dun hotel de Compostela onde estaba prevista unha xuntanza na que particpaban o prsidente da Xunta de Galiza, Alberto Núñez Feijoo e a conselleira de Traballo, Beatriz Mato.

Tras un amago de carga policial, a conselleira achegouse aos folguistas e ante os medios de comunicación adquiriu o compromiso de mediar no conflito e buscar unha saída á situación que padecen os traballadores e os arredor de 100.000 usuarios afectados pola folga.

Polo momento, non se concretou nada ao respecto, polo que a folga continuará esta fin de semana.