Os carteiros/as de Vigo rexeitan na rúa a eliminación de 13 postos de traballo na unidade de reparto do centro da cidade

Arredor de 400 persoas participaron na manifestación que percorreu onte martes as rúas de Vigo para rexeitar a eliminación por parte de Correos de 13 postos de traballo na unidade de reparto do centro. Os carteiros/as denuncian que os recortes no servizo son o primeiro paso cara a privatización da empresa e anuncian a convocatoria de tres días de folga a xornada completa para finais de mes.

A marcha partiu ás 20.00 horas da central de Correos na cidade, na Praza de Compostela, para percorrer distintas rúas do centro. Durante o traxecto os/as manifestantes corearon consignas como “Máis carteiros e menos xefes”, “Así, así, nin un paso atrás, estes recortes ímolos parar” ou “Contra os recortes temos outro plan, directivos baixada salarial”.

A protesta coincide coa folga de media xornada iniciada o pasado luns para rexeitar a eliminación de 13 postos de traballo na unidade de reparto número 1, correspondente ao centro da cidade, e que xa deixou preto de 300.000 obxectos sen repartir. Esta unidade de reparto dá servizo a 184.000 cidadáns/ás.

Ao remate da marcha os carteiros/as lembraron que os recortes céntranse no centro de Vigo por seren “unha carteiría da cidade máis importante do país e unha das máis reivindicativas”. Neste senso, denuncian que detrás da decisión agóchase o plan de privatizar Correos.

O responsábel da CIG en Correos de Vigo, Antonio García, adiantou que as mobilizacións continuarán nos vindeiros días e que para os días 22, 25 e 29 hai convocadas xa tres xornadas completas de folga.