Os mariscadores/as de Ferrol advirten da crítica situación pola alta mortalidade do molusco e o baixo prezo de comercialización

A CIG reclama á Consellaría de Medio Ambiente que cumpra o acordo de financiar o plan de limpeza e rexeneración presentado polo colectivo

O co voceiro da CIG de Ferrol, o secretario comarcal da FGAMT-CIG e o vicepatrón da Confraría de Barallobre, acompañados polo Deputado do BNG, Bieito Lobeira, alertaron da crítica situación que atravesa o sector marisqueiro da ría, do que dependen directamente 500 familias, por mor da elevada taxa de mortalidade do produto nas bateas depuradoras, os prezos irrisorios aos que se están pagando os moluscos e o incumprimentos dos compromisos adoptados pola Xunta de Galiza.

O co-voceiro da CIG de Ferrol, Xesús Anxo López Pintos, explicaba as dificultades económicas que padecen os mariscadores e mariscadoras da ría de Ferrol, debido a que nestes momentos máis do 20% do marisco depositado nas bateas de depuración (instaladas a causa da cualificación como zona C de moitas áreas da ría) está morrendo no proceso. A isto hai que engadir a escasa rendibilidade da actividade extractiva provocada pola baixada do prezo dos moluscos (o quilo de ameixa babosa págase a 3.5 euros, cando no mercado se vende a 18 euros).

“Estas circunstancias provocan unha baixada dos ingresos e a moitos mariscadores/as xa só lles dá para pagar as cotas á Seguridade Social, pero para nada máis”, advertía.

Dende o colectivo acusouse á Xunta de Galiza polo abandono aos que os ten sometido, xa que, a pesar das demandas do sector, o Goberno galego nin sequera convocou a Mesa de Dinamización (con representación de organizacións sindicais, de mariscadores/as e administracións de diferente ámbito) dende o pasado mes de marzo.

Naquela última reunión, o propio conselleiro de Medio Ambiente chegou a un acordo co colectivo de traballadores/as para que presentasen un plan de traballo de limpeza e rexeneración da ría que sería financiado polo departamento autonómico mentres non estea concluída a rede de depuración. “Os/as mariscadores/as presentaron o plan, que supuña alternar días de extracción con días de tarefas alternativas, pero até o momento non se sabe nada, e dende a Xunta descúlpanse con que xa instalaron as bateas depuradoras”, sinalou Pintos.

Neste senso, o co voceiro da CIG de Ferrol rexeitou a desidia da Xunta diante dos elevados índices de contaminación das augas, criticando que “en vez de favorecer os traballos para mellorar a ría, prefira mirar para outro lado” pondo en perigo a continuidade da actividade produtiva para 500 familias. Cómpre lembrar que a depuración da ría estaba comprometida para o ano 1996, pero a día de hoxe non se agarda que estea rematada até o 2015.

Falta de pagos e furtivismo

A precaria situación destes/as profesionais, puntualizaron, agudizouse nas últimas semanas, porque a Consellaría do Mar non paga á empresa que se encarga do reparqueo do marisco, e esta hai dous meses que non abona o salario dos seus traballadores/as, que ante esta situación tamén se negan a traballar.

Xunto a isto, os mariscadores e mariscadoras alertaron do incremento do furtivismo, que non só afecta aos moluscos con tamaño adecuado para comercializar, senón que agora os furtivos/as comezan a recoller cría que transportan e venden nos parques das Rías Baixas.

“Actitude mafiosa”

Durante a comparecencia, denunciouse tamén a “actitude mafiosa” amosada pola Consellaría do Mar para disuadir aos traballadores/as do mar e impedir que fagan denuncias públicas da súa grave situación. A crítica viña a colación do acontecido a un mariscador que logo de aparecer nos medios denunciando a elevada mortalidade do marisco nas bateas, veu como, aos poucos días, a administración lle decomisaba os aparellos que ten para saír traballar.

O afectado puxo denuncia no xulgado e na Inspección Pesqueira e finalmente devolvéronlle unha parte dos apeiros, mais en condicións inservíbeis, polo que non pode saír traballar. O deputado do BNG, Bieito Lobeira, comprometeuse a levar a documentación sobre este caso á Consellaría, co obxecto de abordar os feitos, reclamar que lle devolvan todas as pertenzas ao traballador e evitar que se volvan repetir prácticas deste tipo.