A CIG rexeita a detención ‘preventiva’ de persoas na sede de LAB para evitar a creación dunha organización política

A Executiva Confederal da CIG quere facer público a seu rexeitamento á detención da que foron obxecto onte unha decena de persoas na sede do sindicato LAB ou nos seus propios domicilios. A CIG considera que con este tipo de actuacións vulnéranse dereitos fundamentais individuais e colectivos e que se atenta contra principios básicos que deberían ser inalienábeis nun Estado de Dereito.  A CIG considera que estas detencións rachan co principio de separación de poderes ao utilizaren o executivo e, nomeadamente, o Ministerio do Interior, á Audiencia Nacional para realizar unhas detencións que teñen unha clara finalidade política. Máis cando a separación de Poderes representa un principio básico dos chamados Estados de Dereito para garantir unha independencia xudicial que no Estado Español está cada vez máis en dúbida.

A CIG non entende como se pode aplicar unha lei tan cuestionábel para un sistema democrático como a Lei de Partidos para encarcerar a persoas que estarían ‘presuntamente’ organizándose para crear unha organización política que ‘podería’ ser ilegal, sen sequera a garantía dun xuízo previo.

A CIG rexeita ademais que se vulneren dereitos fundamentais como o da presunción de inocencia, de reunión, de asociación, de expresión ou de pensamento. Dereitos que están consagrados na Constitución que tanto din defender aqueles que precisamente neste caso a están a incumprir.

Para a CIG, como sindicato nacionalista, é especialmente preocupante que se comece a valorar a posibilidade de abrir unha vía para aplicar a antidemocrática Lei de Partidos contra unha organización sindical como LAB, terceira en representación en Euskal Herria. Unha cuestión que responde unicamente á obsesión xacobina do Estado por atacar a aquelas persoas ou organizacións que cuestionen o seu modelo de España.

Desde a CIG enténdese que con esta decisión actúase contra persoas que, como Rafa Díez, viñan defendendo publicamente a vía da negociación e do diálogo para acabar co conflito que vive Euskal Herria, tal e como el mesmo afirmou nunhas xornadas organizadas pola CIG cando xa estaba rematada a tregua. Unha actuación que constata o nulo interese do Estado por darlle unha solución ao problema basco.