A CIG esixe a dimisión dos máximos responsábeis de seguridade no Porto Exterior ante o accidente mortal rexistrado este venres

Diante do gravísimo accidente ocorrido esta tarde nas obras do Porto Exterior da Coruña que lle custou á vida a un traballador de Grúas Usabiaga, a CIG esixe á dimisión dos máximos responsábeis da Autoridade Portuaria en materia de seguridade, así como que se depuren as posíbeis responsabilidades penais por este feito.

A central sindical traslada as súas condolencias á familia do traballador, que faleceu mentres realizada unha manobra de desmontaxe dun dos guindastres do porto, e advirte que utilizará todos os mecanismos legais e xudiciais ao seu alcance co obxecto de que se depuren as responsabilidades e culpabilidades por este accidente.

A CIG ten denunciado en reiteradas ocasións a falta de medidas de seguridade, e o relaxamento das mesmas, nas obras do porto exterior e as eivas dos protocolos a seguir. Ademais, a central sindical xa alertou reiteradamente que a maquinaria coa se está a traballar non reúne as condicións mínimas de seguridade.

Cómpre lembrar que hai uns meses dúas grúas que operaban en Punta Langosteira caeron con poucas semanas de diferenza sen que até o momento se teñan esclarecido as causas destes sucesos. Naquel entón, a Unión Comarcal da CIG na Coruña xa advertira que o mantemento da maquinaria non era o adecuado para a cantidade excesiva de horas de traballo sen descanso que se realizan e, ao mesmo tempo, denunciaba a imprudencia e temeridade amosada pola Autoridade Portuaria e a UTE en materia de seguridade.

Este accidente, de gravísimas consecuencias, volve demostrar as graves carencias e os incumprimentos en materia de seguridade e saúde laboral existentes nas obras de Punta Langosteira; situación especialmente agravada nos últimos tempos dada a premura que se imprimiu ás obras para rematalas o antes posíbel.