A Patronal volve rachar as negociacións do convenio provincial do Metal de Pontevedra

O mércores 13 de maio volvian rachar as negociacións do Convenio do Metal da provincia de Pontevedra, e é que de novo a Patronal deste sector, excusándose nas mobilizacións dos traballadores dos estaleiros contra a contratación irregular no naval desa xornada, volvía abandonar a mesa, na que sempre presentaron as mesmas propostas, cun convenio para dous anos e perda de poder adquisitivo para os traballadores. A CIG-Metal, neste contexto, considera que é "moi importante volver dar unha mostra de forza e convocar novas medidas de presión para facer que esta situación cambie e volvamos a situarnos nun marco de negociación favorábel para os intereses dos traballadores e traballadoras do Metal da provincia de Pontevedra".

A ruptura das negociacións coa Patronal, despois de que se retomaran nesta mesma semana estas conversas, para Miguel Malvido, secretario nacional da CIG-Metal, Miguel Malvido, "vén de confirmar a súa actitude na mesa negaciadora, a intransixencia e cerrazón desta patronal, polo que é necesario mudar as circunstancias que nos levaron a este punto e volver amosar a esta patronal que os traballadores imos loitar polo convenio, e que imos gañar esta batalla".

Asemblea conxunta o venres

Nese sentido, sobre a unidade da acción sindical, Malvido engadiu que "o venres continúa convocada unha asemblea conxunta das tres centrais sindicais, CIG, CCOO e UGT, ás once no salón de actos dos Capuchinos, que é importante para definir a folla de ruta para as próximas semanas".

Asi, o secretario nacional da CIG-Metal indicou que "desde a CIG apostamos pola unidade da acción sindical, e continuamos apostando pola convocatoria de accións conxuntas e medidas de presión fortes para a próxima semana".