Inspección de Traballo sanciona ao Grupo Gadisa con 50.000 euros por vulnerar os dereitos sindicais

Os representantes dos traballadores e das traballadoras do Grupo Gadisa compareceron en rolda de prensa para denunciar a falla de dereitos sindicais e laborais á que están sometidos todas as firmas do grupo empresarial. Roberto Pérez, responsábel do sector do comercio da Federación de Servizos da CIG da Coruña, criticou  as prácticas represivas e antisindicais levadas a cabo pola empresa, que lle teñen custado unha infracción tipificada como moi grave pola Inspección de Traballo.

“As relacións laborais que o grupo mantén cos traballadores e traballadoras son as que mantiña hai trinta anos, utiliza métodos autoritarios e recorre as ameazas e as coaccións cada vez que hai que negociar”. Así o afirmou o responsábel do sector do comercio da Federación de Servizos da CIG da Coruña, Roberto Pérez, que estivo acompañado polo Secretario Xeral da CIG, Xesús Seixo, e os presidentes dos Comités de Empresa da firma na Coruña.

Como mostra da grave situación que sofren os/as empregados/as de Gadisa, Pérez deu a coñecer unha acta da Inspección de Traballo, na que se sanciona á empresa con 50.000 euros por unha infracción tipificada como “moi grave”. O responsábel de comercio indicou que, logo da resolución de Traballo, a central vai presentar unha demanda pola vía penal contra o Grupo Gadisa para “demostrar que se cometeu un delito contra os dereitos fundamentais dos traballadores e das traballadoras”.

Actitude antisindical

A acta dá conta das actuacións antisindicais que a dirección da firma pon en práctica para evitar que os/as traballadores/as exerzan libremente os seus dereitos laborais. Na mesma, recoñécese que os responsábeis de Ecomás Supermercados (unha das firmas de Gadisa) impediron ou tentaron impedir o libre exercicio do dereito a participar na empresa a través do comité, así como que dende a dirección se tentou impedir que os candidatos da CIG se presentasen ás eleccións sindicais baixo ameazas e coaccións.

A falla dunhas relacións laborais xustas e limpas cos traballadores/as chega a tal punto que mesmo a empresa se encarga de redactar as actas da Mesa Electoral e desenvolver o papel que lle correspondería ao Presidente da mesma. Unha práctica que Inspección constatou que está estendida noutras firmas do Grupo.

Falla de dereitos

O responsábel de comercio da CIG da Coruña indicou que o método das ameazas tamén se pon en práctica cando se trata da negociación individual e colectiva. Neste senso apuntou que sempre “temos que recorren á vía da demanda para chegar a algún acordo”.

Pérez sinalou que non se respectan os acordos recollidos no convenio colectivo, non se pagan as horas extras, nin o plus de nocturnidade, chegando mesmo a modificar os horarios nalgún dos almacéns para evitar ter que aboar os cartos.

Gadisa tampouco cumpre a normativa no caso da contratación temporal, que se “atopa toda en fraude de lei e cando un traballador reclama os seus dereitos págaselle directamente o despedimento”. De igual xeito, non existe plan de prevención de riscos laborais nin se desenvolveu o Plan de Igualdade, ambos os dous requisitos estabelecidos pola lexislación vixente.

 Campaña

Os membros dos Comités de Empresa aproveitaron a comparecencia para anunciar o inicio dunha campaña destinada a denunciar publicamente a súa precaria situación laboral e a falla de dereitos. Dentro da iniciativa está previsto a elaboración dunha páxina web e o reparto de camisetas entre a cidadanía.